20 qańtardan beri respýblikalyq mańyzy bar joldarda qar qursaýynda qalyp qoiǵan 35 myńnan astam jolaýshy qutqaryldy. Bul jaiynda QR IIM TJK Daǵdarys jaǵdailarynda basqarý ortalyǵynyń ókili Liýbov Ablanova aitty, dep habarlaidy "Ult aqparat".
«Respýblika aýmaǵynda aýa raiynyń nasharlaýyna bailanysty 20 qańtar men 7 aqpan aralyǵynda oblys joldaryndaǵy qolaisyz jaǵdaiǵa tap bolǵan 35 myńnan astam adam qutqaryldy. Onyń ishinde 370 bala bar. 4 myńnan astam evakýatsiialandy jáne joldardyń tazalanǵan bóligine 35 myńǵa jýyq tehnika shyǵaryldy. Tek ótken táýlikte ǵana respýblika joldarynda 35 adam, onyń ishinde bir bala qutqarylyp, 12 tehnika qar qursaýynan shyǵaryldy», - dedi Liýbov Ablanova QR IIM baspasóz qyzmeti taratqan video materialda.
Onyń dereginshe, aýa raiynyń nasharlaýyna bailanysty respýblika joldarynda qalyptasqan jaǵdaiǵa den qoiý úshin azamattyq qorǵaý kúshteri men tehnikalary jaýyngerlik daiyndyqqa keltirildi. Búgingi tańda aýa raiynyń qolaisyzdyǵyna jáne joldardy qardan tazalaýǵa bailanysty Aqmola, Shyǵys Qazaqstan, Qostanai, Soltústik Qazaqstan oblystarynda 28 jol ýchaskesi jabyq.
«Onyń 4-eýi respýblikalyq jáne 24-i oblystyq mańyzy bar jol. Qar qursaýynda qalǵan adamdardy qutqarý jáne evakýatsiialaý boiynsha sheshimdi jedel qabyldaý nátijesinde úsik shalýǵa jáne adamdardyń qaza tabýyna jol berilgen joq», - dedi ortalyq ókili.
