Qazaqstannyń 7 boksshysy jattyqtyrýshylarmen jáne dárigerlermen birge Aziia oiyndaryna attandy, dep habarlaidy QazAqparat tilshisi.
QR Boks federatsiiasynyń málimetinshe, Qazaqstan komandasy aldymen Astanadan Bangkokqa deiin ushady. Odan keiin úsh saǵat ushaq kútip, 4 saǵat ushyp Djakartaǵa jetedi. Alǵashqy eki kúnde boksshylarymyz demalyp, jergilikti klimatqa, tamaǵyna beiimdeledi.
«Alǵashqy eki kún beiimdelý ýaqyty. Al 18-i kúni oiyndardyń ashylý rásimine qatysamyz. 19-ynan bastap alǵashqy kezdesýlerge daiyndyqty bastaimyz. Ózimizben birge 20 keli jylqy etin áketip baramyz. Jigitter kimge qansha jáne qai ýaqytta jeý kerektigin ózderi sheshedi», - dedi ulttyq quramamyzdyń bas jattyqtyrýshysy Myrzaǵali Aitjanov.
Komandanyń dárigeri Irek Satovtyń aitýynsha, Aziianyń ystyq elderinde ishek juqpaly aýrýlaryn juqtyrý qaýpi joǵary.
«Sondyqtan múmkindiginshe qoldy jii jýý kerek. Biz shúmekten aǵyp turǵan sýmen tizdi tazalamaýǵa keńes beremiz. Bótelkedegi sýdy paidalanǵan jón. Barlyq ýaqytta da mundai jarystarǵa úlken júkpen baramyz. Al bul joly Aziadanyń meditsinalyq shtaby kómektesip, keibir dári-dármektermen qamtamasyz etedi. Sondyqtan bul joly Djakartaǵy dáriger men massajshy 40 keliden astam dári-dármek apara jatyr», - dedi ol.
Aita keteiik, boksshylarymyzdyń sharshy alańdaǵy kezdesýleri 24 tamyzda bastalady. Finaldyq jekpe-jekter 1 qyrkúiekte ótedi.
