Ulttyq jobalar aiasynda halyqqa IT daǵdylaryn tegin úiretetin 20 innovatsiialyq mektep ashylady. Bul týraly QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin aityp berdi, dep habarlaidy QazAqparat.
«Baǵdarlamalaý boiynsha 20 innovatsiialyq mektep quramyz. Bul JOO emes, kolledj de emes, 2 jylda joǵary bilikti mamandar daiarlai alatyn innovatsiialyq baǵdarlamalaý mektepteri dep atalady. Búginde elimizde dál osyndai 2 mektep bar, onyń túlekteri Qazaqstanda otyryp-aq, jahandyq Big Tech kmopaniialarǵa jumys istep júr», - dedi ministr Ortalyq kommýnikatsiialar qyzmetinde ótken baspasóz máslihatynda.
Ministrdiń aitýynsha, innovatsiialyq mektepterdiń damýyn yntalandyrý úshin Tech Orda baǵdarlamasy boiynsha 20 myń vaýcher bólinedi, olar kez kelgen adamǵa innovatsiialyq baǵdarlamalaý mektebinde tegin oqýǵa múmkindik beredi.
«Bul innovatsiialyq mektepterge tek qana mektep túlekteri nemese stýdentter túsedi degen talap joq, oǵan óz mamandyǵyn ózgertip, IT daǵdylaryn úirengisi kelgen kez kelgen adam túse alady», - dep túsindirdi B. Mýsin.
Aita keteiik, Memleket basshysynyń Joldaýy aiasynda «Tsifrlandyrý, ǵalym jáne innovatsiialar esebinen tehnologiialyq serpilis» ulttyq jobasy ázirlenip, bekitildi. Ulttyq joba 10 baǵyttan, 226 tapsyrmadan, 44 kórsetkishten jáne 211 is-sharadan turady, olardy iske asyrý 2025 jylǵa deiin josparlanǵan. Ulttyq joba aiasynda halyqqa qyzmet kórsetý ortalyqtary da tsifrlyq jáne videoqyzmetterin iske qosady.
Sonymen birge, Qazaqstannyń barlyq balalary informatika jáne baǵdarlamalaý boiynsha sapaly bilim alýy úshin «Virtýaldy informatika muǵalimi» jobasy iske asyrylmaq.
