Foto: canva
Internette 2 tamyzda búkil álem 6 minýtqa qarańǵylyqqa shomady degen aqparat tarady, dep jazady inbusiness.kz saity Space basylymyna silteme jasap.
Mundai qubylys taǵy 100 jyl boiy qaitalanbaidy degen de boljam bar. Bul habarlama shyndyqqa birshama jaqyn bolǵanymen, kei tustary naqty ǵylymi derekpen sáikes kelmeidi.
2027 jyldyń 2 tamyzy – astronomiia tarihyndaǵy erekshe kún bolmaq. Bul kúni XXI ǵasyrdaǵy eń uzaq tolyq kún tutylýy tirkeledi.
Astronomdardyń esebi boiynsha, Ai Kúndi tolyq jabatyn kezeń 6 minýt 22 sekýndqa sozylady. Bul – Jerden baqylaýǵa bolatyn eń uzaq túnek sátteriniń biri.
Salystyrsaq, 2024 jyldyń sáýirinde Soltústik Amerikada ótken tolyq kún tutylýy eń uzaq degende 4 minýt 28 sekýndqa ǵana jetken edi.
Tutylýdyń tolyq fazasy 258 shaqyrymdyq jińishke jolaqpen ótedi. Bul jolaq Ispaniianyń ońtústiginen bastalyp, Gibraltar, Soltústik Afrika elderi – Marokko, Aljir, Týnis, Liviia, Mysyr arqyly ótip, Taiaý Shyǵysqa – Saýd Arabiiasy, Iemenge, ári qarai Somali men Sýdan aýmaǵyna jetedi. Osy 11 eldiń turǵyndary aspan nurynyń kózden tasa bolǵan sátin tolyqtai tamashalai alady.
Kún tutylýdyń jartylai fazasy Afrikanyń kóp bóliginde, Ońtústik Aziia men Eýropanyń keibir óńirlerinde kórinedi. Alaida basqa qurlyqtarda bul qubylys baiqalmaidy. Demek, "búkil álemge qarańǵylyq túsedi" degen túsinik shyndyqqa sáikes kelmeidi. Bul – Jerdiń geografiialyq ornalasýyna jáne Kún men Aidyń orbitalyq qozǵalysyna bailanysty.
Ǵalymdar erekshe astronomiialyq qubylysty óz kózimen kórgisi keletin jandarǵa aldyn ala daiyndalýǵa keńes beredi. Ásirese tutylý jolaǵynda ornalasqan óńirlerde aýa raiynyń qolaily bolýyn baqylap, arnaiy qorǵanysh áinekter nemese kún filtrleri arqyly qaraý qajet. Kúnge tikelei qaraý – kórý qabiletine zaqym keltirýi múmkin.
2027 jylǵy tolyq kún tutylýy – tek astronomiiaǵa qyzyǵýshylar úshin ǵana emes, búkil adamzat úshin biregei ǵylymi ári tabiǵi qubylys bolmaq.
