2020 jyldyń 3 aiynda 2 mln gektar aýyl sharýashylyǵy jeri memleket menshigine qaitaryldy. Bul týraly QR Aýyl sharýashylyǵy ministri Saparhan Omarov esep berý kezdesýinde aitty, dep habarlaidy QazAqparat.
«2019 jyly 5,6 mln gektar paidalanylmaityn jer, onyń ishinde shamamen 800 myń gektar egistik, 4,6 mln gektar jaiylym anyqtaldy. Bul qaǵaz esepter negizindegi dástúrli monitoring pen aqparatty salystyryp-tekserý barysynda naqtylandy. Atalǵan jerler boiynsha den qoiý sharalary qabyldanǵannan keiin búgingi kúni 1,9 mln gektardy burynǵy jer paidalanýshylar igere bastady; 1,1 mln gektar jer paidalanýshylardyń óz erikterimen bas tartýy arqyly memleket menshigine qaitaryldy; 2,6 mln gektardy memleket menshigine qaitarý úshin ákimdikter protsessýaldyq sot jumystaryn júrgizýde», - dedi miinstr Ortalyq komýnikatsiialar qyzmetindegi onlain kezdesýde.
Ministrdiń aitýynsha, aýyl sharýashylyǵy maqsatyndaǵy jerlerdiń paidalanylýyna baqylaýdy kúsheitý maqsatynda 2019 jylǵy 28 qazanda Jer kodeksine Jerdi qashyqtyqtan zondtaý arqyly aýyl sharýashylyǵy jerlerine tsifrlyq monitoring júrgizýge qatysty ózgerister engizildi. Osy jylǵy qańtarda Aýyl sharýashylyǵy jerlerin paidalanýdy ǵaryshtyq monitoringteý qaǵidalary qabyldandy.
«Aqmola, Qostanai, Shyǵys Qazaqstan jáne Mańǵystaý oblystarynda veb-portal arqyly aýyl sharýashylyǵy maqsatyndaǵy jerlerge monitoring júrgizý jónindegi pilottyq joba iske qosyldy. Onyń nátijesinde jalpy alańy 7,3 mln gektardy quraityn júktelmegen 9061 jaiylymdyq alqap anyqtaldy. 2020 jyldyń 3 aiynyń qorytyndylary boiynsha memlekettik menshikke 2 mln gektardan astam jer qaitaryldy», - dedi Saparhan Omarov.
