QR Parlamenti Senatynda jaiylymdardy paidalaný máselesin qozǵaityn eki birdei zań jobasy tanystyryldy, dep habarlaidy QazAqparat.
Senat spikeri Máýlen Áshimbaev «Qazaqstan Respýblikasynyń keibir zańnamalyq aktilerine jaiylymdardy paidalaný máseleleri boiynsha ózgerister men tolyqtyrýlar engizý týraly» jáne «QR Salyq kodeksi jaiylymdardy paidalaný máseleleri boiynsha tolyqtyrýlar engizý týraly» zań jobalary ne úshin ázirlenip jatqanyn túsindirdi.
«Qazirgi tańda halqymyzdyń 40 paiyzdan astamy aýyldy jerde turatyny belgili. Onyń kóbiniń negizgi tabysy da, kúnkóris kózi de qolyndaǵy jeke maly desek, artyq aitqandyq bola qoimas. Alaida sońǵy jyldardaǵy jaiylymnyń tapshylyǵy aýyl turǵyndary úshin úlken máselege ainalyp otyr. Memleket basshysy 2021 jylǵy Joldaýynda osy máselege arnaiy toqtalǵany belgili. Sol kezde Qasym-Jomart Kemeluly jaiylymdyq jerlerdi tiimdi paidalanýǵa basa mán berdi. Sondai-aq, jeke qosalqy sharýashylyqtardyń malyn jaiylymdyq jermen qamtamasyz etý máselesine airyqsha nazar aýdarý qajettigin aitty», - dedi Senat tóraǵasy.
Máýlen Áshimbaevtyń málimeti boiynsha, Qazaqstan jaiylym jer resýrstarynyń kólemi boiynsha álemde altynshy oryn alady.
«Elimizde jaiylym jerleriniń jalpy aýdany - 184,3 mln gektary. Biraq búgingi tańda osy kólemniń 21 mln gektarynda ǵana jeke qosalqy sharýashylyqtardyń malyn jaiýǵa múmkindik bar. Sonymen qatar, elimizdegi jaiylymdyq jerlerdiń ónimdiligi men sapasynyń nasharlaýy da úlken másele bolyp otyr. Oǵan jaiylymda jaiylatyn mal basynyń shekti deńgeiden asyp ketýi óz saldaryn tiigizýde. Alqaptardy shamadan tys qarqynda paidalaný jáne jaiylym júktemesin saqtamaý ekologiialyq tepe-teńdikti buzyp otyr. Bul jemshóp kóleminiń tómendeýine ǵana emes, jerdiń tozýyna, eroziianyń artýyna ákelip soqtyrdy», - dedi Senat spikeri.
