18,3 myńǵa jýyq turǵynnyń múgedektik merzimi birden 3 aiǵa sozyldy, dep habarlaidy "Ult aqparat" QR Eńbek jáne halyqty áleýmettik qorǵaý ministrligine silteme jasap.
Ministrlik baspasóz qyzmetiniń málimetinshe, vedomstvoda múgedekterdi qoldaý boiynsha qosymsha sharalar qabyldanǵan.
«Qaita qaraý merzimi tótenshe jaǵdaidan bir ai buryn jáne osy kezde (16 aqpannan 10 mamyrǵa deiin) oryn alǵan jáne qaita tekserýden ótpegen múgedekter úshin múgedektik merzimi avtomatty túrde buǵan deiin belgilengen qaita tekserý kúninen bastap 3 aiǵa uzartylady. Sonymen birge qaita tekserý merzimi aqpan aiyna kelgen múgedekterge ai tolyq esepteledi», delingen habarlamada.
Bul sharalar múgedekterge áleýmettik qoldaý kórsetý, sondai-aq Tótenshe jaǵdai rejimi aiaqtalǵannan keiin karantindik sharalardy saqtaý maqsatynda qabyldanǵan.
«Múgedektikti avtomatty túrde uzartý meditsinalyq-áleýmettik saraptamaǵa qujattardy rásimdeý kezinde bir jerde toptalýyn boldyrmaidy jáne azamattardyń aýrý juqtyrý qaýpin azaitady. Múgedekterdi ońaltýdyń jeke baǵdarlamalaryn júzege asyrý merzimi 3 aiǵa uzartyldy. Buryn usynylǵan ońaltý sharalary, sonyń ishinde tehnikalyq ońaltý quraldarymen qamtamasyz etý kúshinde qalady.
Múgedekterdi áleýmettik qoldaýdyń barlyq áleýmettik qoldaý sharalary men jeńildikteri 3 aiǵa uzartyldy. Járdemaqy buryn aiqyndalǵan múgedektik tobyna, eńbekke jaramsyzdyq dárejesine sáikes tólenedi.
Aita ketý kerek, densaýlyǵynyń jaǵdaiy ózgergen jaǵdaida, múmkindigi shekteýli jandar qaita tekserýden buǵan deiin belgilengen merzimnen buryn ótýge quqyly», delingen habarlamada.
Baspasóz qyzmetiniń málimetinshe, qaita saraptama taǵaiyndalǵan ýaqytynan bastap bir ai ishinde jasalýy kerek. Mysaly, qaita tekserý merzimi 20 naýryzda kelgen bolsa, onda merzim avtomatty túrde 20 maýsymǵa deiin uzartylady, al 20 shildege deiin qaita tekserýden ótý kerek.
