Grýziia men Reseiden 180-ge jýyq qazaqstandyq azamat elge jetkizildi, dep habarlaidy "Ult aqparat" QR Indýstriia jáne infraqurylymdyq damý ministrligine silteme jasap.
«Koronavirýs pandemiiasy týdyrǵan álemdegi qolaisyz jaǵdaiǵa bailanysty otandyq áýe kompaniialar Qazaqstan azamattaryn qaitarý reisterin oryndaýda. Ótken táýlik ishinde azamattyq aviatsiianyń áýe kemelerimen shet elderde qalǵan jolaýshylardy tasymaldaý úshin birqatar reister jasaldy. Air Astana aviakompaniiasy Tbilisiden Almatyǵa 143 jolaýshyny, Scat aviakompaniiasy Máskeý qalasynan (Vnýkovo) 35 jolaýshyny, onyń ishinde tranzitpen kelgen qazaqstandyq týristerdi elimizge alyp keldi», - delingen aqparatta.
