Óskemen qalasyndaǵy Úlbi ózenine 18 jastaǵy jigit batyp ketti, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, 1 tamyzda úiden shyǵyp ketken 18 jastaǵy jigit sol-kúii qaityp oralmaǵan. Kelesi kúni Úlbi ózeniniń janynan ótip bara jatqan adamdar onyń jeke zattary men uialy telefonyn taýyp alyp, týystaryna habar bergen.
«3 tamyz kúni habar-osharsyz ketken azamattyń týystary qutqarýshylardan kómek surady. Sóitip, izdestirý jumystary dereý qolǵa alyndy. Ókinishke qarai, búgin Úlbi ózeninen er adamnyń máiiti tabyldy», - dep habarlady vedomstvo ókilderi.
Osy rette, departament mamandary óńir jurtshylyǵyna jabdyqtalmaǵan jerlerde shomylmaý qajettigin eskertedi.
