Shetelden elge oralǵysy keletin Qazaqstan azamattarynyń barlyǵyn ákelemiz. Bul týraly QR Aqparat jáne qoǵamdyq damý ministri Dáýren Abaev málim etti, dep habarlaidy QazAqparat.
«Qazir shetelde Qazaqstan Respýblikasynyń 175 myń azamaty bar. Olardyń kópshiligi Otanyna oralǵysy keledi. Prezident aitqandai, memleket eshkimdi qiyndyqta tastamaidy. Sondyqtan qaita oralǵysy keletinderdiń barlyǵyn ákelemiz. Qazir Syrtqy ister ministrligi osy baǵytta úlken jumys júrgizýde», - dedi ministr «Habar 24» telearnasynyń tikelei efirinen.
Osy oraida ol jaqyn arada sheteldegi azamattardy tasymaldaý bastalatynyn aitty.
«Ózderińiz biletin shyǵarsyzdar, keibir damyǵan elderdiń ózinde shetel azamattaryn emdeýden bas tartyp, meditsinalyq saqtandyrýdy joiyp jatyr. Mysaly, biz AQSh-tan 179 azamatymyzdy alyp kelemiz. Bular stýdent pen mektep oqýshylary. Polshadan 65, Izrailden 28 azamatymyzdy jetkizemiz. Reseiden mamyr aiynda 6 myńnan asa azamatymyzdy ákelýdi josparlaýdamyz», - dedi Dáýren Abaev.
