Ózbekstandyq bozbala Nodirbek Abdýsattorov Varshavada jyldam shahmattan álem chempionatynda jeńiske jetti. Bul týraly Ózbekstan shahmat federatsiiasynyń baspasóz qyzmeti habarlady, dep jazady Azattyq.
17 jastaǵy ózbek shahmatshysy Nodirbek Abdýsattorov álem chempiony Magnýs Karlsenmen, álem chempiony ataǵyna talasqan Ian Nepomniashiimen, basqa da tanymal grossmeisterlermen oinady.
Sheshýshi tai-breikte jas shahmatshy reseilik Ian Nepomniashiiden 1,5:0,5 esebimen basym tústi.
Bunyń aldynda ol álem chempiony ataǵyn birneshe jyldan beri eshkimge bermei kele jatqan norveg Magnýs Karlsendi jeńgen edi.
17 jastaǵy qazaqstandyq Bibisara Asaýbaeva jyldam shahmattan álem chempionatynda kúmis júldege ie boldy.
Ózbekstan prezidentiniń baspasóz hatshysy Sherzod Asadovtyń habarlaýynsha, memleket basshysy Shavkat Mirziiaev jyldam shahmattan álem chempionatynda Nodirbektiń oiynyn onlain tamashalaǵan. Prezident bul ýaqytta Sankt-Peterbýrgtegi sammitten Tashkentke ushaqpen qaityp kele jatqan.
"Memleket basshysy jyldam shahmattan jańa ári jas álem chempionyn jeńisimen quttyqtap, onyń ata-anasy men bapkerlerine alǵys aitty", - dedi prezidenttiń baspasóz hatshysy Sherzod Asadov.
Jyldam shahmattan álem chempionaty Polsha astanasynda ótti. Sársenbi kúni Varshavada blitsten álem chempionaty bastalady. Álem birinshilikteri biyl Nur-Sultan qalasynda ótýi tiis bolǵan, biraq Halyqaralyq shahmat federatsiiasy jarystardy Polsha astanasyna aýystyrdy.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036
