17 tamyzdan keiin qyzmetine ruqsat berilmeitin nysan qyzmetkerlerine óteamqy tóleý usynysy engiziledi. Bul týraly búgin Ortalyq kommýnikatsiialar qyzmetinde ótken onlain-brifingte «Atameken» Ulttyq kásipkerler palatasy basqarma tóraǵasynyń birinshi orynbasary Eldar Jumaǵaziev aitty, dep habarlaidy QazAqparat.
Brifingide: «17 tamyzdan bastap jumysyn bastamaityn kásirkerlerge 42 500 teńgeden tólene me?», - degen suraq qoiyldy.
«Jumystaryn bastaýǵa ruqsat berilmegen qyzmet túrleri de bar. Olarǵa qatysty usynystarymyzdy daiyndap jatyrmyz. Mysaly, saparjaida 74 adam jumyssyz otyrýǵa májbúr. Bul, biýdjet múmkindigine qatysty suraq deýge bolady. Pandemiia kezinde biz ótemaqy tóleý týraly bastama kóterdik. Birinshi aida ótemaqy tólendi, odan keiin karantin ýaqyty taǵy sozyldy. Endi, osy máselege qatysty QR Ekonomika ministrligimen birigip usynys ázirleimiz», - dedi Eldar Jumaǵaziev.
Onyń aitýynsha, 17 tamyzdan keiin qyzmetine shekteý qoiylǵan biznes nysandarynyń qatary azaiady.
«Saýda ortalyqtary men úlken bazarlarǵa qatysty táýekel kóp. Ol jerde saqtyq sharalary qalai saqtalady, ony qalai retteý kerek - bul jaǵy úlken suraq. Jumysy toqtap turǵan kásipkerlerge ótemaqy berilýin qoldaimyz. Qazirgi ýaqytta salyq tóleýdi, nesie tóleýdi shegerýge qatysty suraqtardy qarastyryp jatyrmyz», - dedi ol.
Aita keteiik, 13 tamyz kúni QR Premer-Ministri Asqar Maminniń tóraǵalyǵymen ótken memlekettik komissiia otyrysynda Karantin sharalaryn kezeń-kezeńimen alyp tastaý jospary qaraldy.
