26 tamyzda Aqtóbedegi atyshýly qylmystyq iske núkte qoiyldy. "Vygodnyi zaim", "Garant 24 lombard", "Esteit Lombard", "Nýr-Ali Kapital" JShS-in quryp, 17 myńnan astam salymshynyń aqshasyn alǵan qylmystyq topqa úkim shyqty, - dep habarlaidy Tengrinews.kz.
17 myńnan astam qazaqstandyqty aldaǵan 48 aiyptalýshynyń soty bir jyldan asa ýaqytqa sozyldy. 48 sottalýshynyń isi 3 786 tomnan turady.
Is materialyna súiensek, Qylmystyq kodekstiń "Zańsyz kásipkerlik, zańsyz banktik, mikroqarjylyq nemese kollektorlyq qyzmet", "Qarjylyq (investitsiialyq) piramidany qurý jáne oǵan basshylyq etý", "Uiymdasqan top, qylmystyq uiym qurý jáne olarǵa basshylyq etý, sol siiaqty olarǵa qatysý", "Alaiaqtyq" baptary boiynsha aiyp taǵyldy.
Sottalýshy J.Esirkepov 2018 jyly Aqtóbe qalasynda "Vygodnyi zaim", "Garant 24 lombard", "Esteit Lombard", "Nýr-Ali Kapital" JShS-in ashyp, adamdardyń senimine kirip, aqsha jymqyrǵan. Salymshylarǵa 30 milliard teńgeden asa shyǵyn keltirgen.
Sot otyrysy kezinde sottalýshylar J.Esirkepov, N.Tanbashev, A.Toichieva óz kinásin ishinara moiyndap, jábirlenýshilerden keshirim surady. Al ózge sottalýshylar kinásin moiyndamai, ózderiniń jaldamaly jumysshy ekenin aitty.
"J.Esirkepov, N.Tanbashev aiypty dep tanylyp, túpkilikti 18 jylǵa bas bostandyǵynan aiyrý jazasy kesilsin. Olar qarjy, kommertsiialyq uiymdarda 10 jyl basqarýshy qyzmetin atqara almaidy. Múlki tárkilenedi", - delingen habarlamada.
Sottalýshynyń bári 10 jyl boiy qarjylyq, kommertsiialyq uiym basqarý quqyǵynan aiyryldy.
Aita keteiik, búgin sot úkiminiń bir bóligi ǵana oqyldy. №2 qalalyq soty baspasóz qyzmetiniń habarlaýynsha, úkim shamamen apta boiy oqylýy múmkin. Kelesi sot úkimi 31 tamyz kúni jariia etiledi.
