Foto Getty Images
Qyzylorda oblysynda jas qyzdy synyptastary 8 ai boiy azaptap, esirtki berip, seks-quldyqta ustaǵany týraly jan túrshigerlik oqiǵa qoǵamda rezonans týdyrdy. Bul týraly alǵash #NeMolchi qory jazǵan bolatyn.
«Qyzymdy úzilissiz eki táýlik boiy jezókshelikke salǵan»
Quldyqta bolǵan 16 jastaǵy qyzdyń anasy qyzynyń mundai aýyr jaǵdaiǵa túskenin bilmegenin aityp, synyptas qyz ekeýi birge bilip, oinap, keide úiine kelip qonatyn deidi.
«Keiin qyzymdy onyń úiine qonýǵa shaqyrdy. Biz basynda qarsy boldyq, keiin kóndik. Biraq únemi bailanysta boldyq. Keiin synyptasy men onyń ápkesi, taǵy bir ul synyptasy men onyń týysy, iaǵni tórteýi qyzymdy jezókshelikke tartqan», - deidi ol.
Onyń aitýynsha qańtarda bul balalar qyzynyń telefonyn tartyp alyp, bopsalap, «Qyzdar.net» saityna tirkegen. 4-aqpannan bastap saittan tapsyrystar kele bastaǵan.
«Keiin úzilissiz eki táýlik boiy jezókshelikke salǵan. Odan túsken aqshanyń barlyǵyn ózderine aýdaryp otyrǵan. Eger aqsha jiberýdi keshiktirse, ony uryp-soqqan», - deidi qyzdyń anasy.
Ol bul oqiǵany mektep ákimshiligi de bilgenin, biraq eger ózderiniń ústinen aryz jazylsa qyzynyń minezdemesi buzylyp, anasyn ata-ana quqyǵynan aiyratynyn aitqan.
«Arnaiy internetqa tapsyramyz dep aitty. Al onda áleýmettik az qamtylǵan otbasylardyń balalary jatady dedi. Olar maǵan «seniń qyzyń óte jýas, ýaqyt óte kele bári ornyna keledi» dep aitty. Qyzym UBT-da tapsyrǵan joq. Tek eki sabaqta otyryp, erte ketetin edi», - degen anasy osynyń bárin toqtatýǵa bolar edi dep qynjyldy.
Jábirlenýshiniń sózinshe iske atalǵan tórt baladan basqa taǵy 3 adamnyń qatysy bar. Ol ózi de, qyzy da ózderin «óltirip kete me» dep qorqatynyn aitady. Qyzylorda oblysynyń Balalar quqyqtary jónindegi ýákili Jaqsygúl Toǵanova jábirlenýshi qyzdyń úiine kúzet qoiylǵanyn aitqan. Alaida qyzdyń anasy áli de ózine qaýip bar dep esepteidi.
Jasóspirim qyzdyń anasy ózine qoǵam tarapynan qysym bolyp jatqanyn aityp otyr.
«Meni kóbi kóshede tanyp, kinálap jatady. Mán-jaidy bilmese de osyndai jaǵdaiǵa jol bergenim úshin sógedi, túsinbeidi», - deidi ol.
Onyń sózinshe kúdiktiler ózderiniń jazadan qutylyp ketetinderine senimdi. Olar sot-meditsina saraptamasyna barǵanda tipti ózin olar keleke etkenin aitady. Jábirlenýshiniń anasy jasóspirim qyzǵa sait arqyly 1000-ǵa jýyq adam kelgen dep otyr. Bul fakt kópshiliktiń jaǵasyn ustatty.
«Biz qandai elde turyp jatyrmyz?!»
Qoǵam belsendileri de bul oqiǵany estip, eseńgirep qalǵanyn aityp jatyr. Qoǵam belsendisi Aitbek Amangeldi:
«Men adam quqyǵyn qorǵaýshylar men qoǵamdyq qorlarmen birge Qazaqstandaǵy zorlyq-zombylyq boiynsha jumys istep júrgenime uzaq ýaqyt bolǵan joq. Bar-joǵy 8-9 ai ǵana boldy. Biraq osy ýaqytqa deiin qanshama oqiǵa estidim... Janyń túrshigedi. Búgingi baspasóz konferentsiiasynda estigenimiz tipti soraqy. 1000 adam - 6 aida... Qalai?! Aitarǵa sózim joq! Ishim alai-dúlei... Biz qandai elde turyp jatyrmyz?!» -deidi A. Amangeldi jeli qoldanýshylaryna.
Advokat Janna Orazbahova:
«Bul qaiǵyly jaǵdaidyń aýqymy bútkil qazaqstandyqtardyń júregine soqqy bolyp tidi. Qyzdy ERESEKTER men olardyń balalary zorlap, paidalanǵan. Miǵa syimaidy!» -dep jazady advokat óziniń áleýmettik jelidegi paraqshasynda.
#NeMolchi qorynyń jetekshisi Dina Táńsári ol adamdardy anyqtaýǵa bolatynyn aityp otyr. Sebebi jynystyq qyzmet kórsetýge tólengen barlyq aqsha qyzdyń bank kartochkasyna aýdarym arqyly túsip otyrǵan.
Resmi organdardyń habarlamalary
Al Ishki Ister ministrligi atalǵan is boiynsha jalǵan aqparat taratqandarǵa qatysty tekseris bastalǵanyn habarlady. Vedomstvo bul iske bailanysty áleýmettik jelilerde kóptegen jalǵan aqparat tarap jatqanyn aityp otyr.
Sonymen qatar, buǵan deiin IIM jábirlenýshi alty aidan beri tiisti organǵa aryz túsirmegen jáne qazir is boiynsha saraptama men tergeý júrip jatqanyn aityp, osy is boiynsha qamaýǵa alynǵan jasóspirimder sot sheshimi boiynsha úiqamaqqa shyǵarylǵanyn málimdegen. Alaida jábirlenýshiniń aryzynan keiin kúdiktiler qaita qamaýǵa alynǵany habarlandy.
«Qyzylorda oblystyq sotynyń qylmystyq ister jónindegi sot alqasy sot aktilerine jábirlenýshiniń ókilinen kelip túsken shaǵymdardy qarady. Kúdiktilerdiń jasaǵan áreketteriniń aýyrlyq dárejesin eskerdi. Kúdiktilerdi sot isin júrgizýge kedergi jasap, tergeýden jáne sottan jasyrynady dep paiymdaýǵa jetkilikti negizder bolǵanyn eskere otyryp, shaǵymdy qanaǵattandyryp, tergeý sotynyń qaýlylaryn ózgertti. Kúdiktilerge 2 ai merzimge «kúzetpen ustaý» túrindegi bultartpaý sharasyn qoldaný týraly qaýly shyǵardy, – dep habarlaidy Qyzylorda oblystyq sotynyń baspasóz qyzmeti.
Sondai-aq, aiyptalýshylardyń ata-anasyna «Bala tárbiesindegi mindetterin oryndamaý» baby boiynsha qylmystyq is ashylyp, tergeý júrip jatqany habarlandy.
