Senat depýtaty Sáýle Aitpaeva 16 jasqa tolmaǵan balalaryn mitingke ertip shyǵatyn ata-analardy jaýapqa tartýdy usyndy, dep habarlaidy Sputnik Qazaqstan.
"16 jasqa tolmaǵan balalaryn mitinke alyp shyǵatyn ata-analardy jaýapqa tartýdy usynyp otyrmyn. Qazir Ákimshilik quqyq buzýshylyq týraly kodekste zańsyz sherýge qatysqany úshin 16 jastan bastap jaýapkershilik qarastyrylǵan. Alaida 16 jasqa tolmaǵan balalaryn mitinke shyǵaratyn ata-analar úshin jaýapkershilik kózdelmegen", - dedi Aitpaeva senat kýlýarynda.
Ol búkil álemde 16 jasqa deiingi balalardy qandai da bir qaýipti iske aralastyrmaý týraly norma qarastyrylǵanyn atap ótti. Depýtattyń áriptesterine mundai usynys tastaýyna ata-analardan kelip túsken hattar túrtki bolǵan.
"Jazdyń aptap ystyǵynda kópbalaly analar parlamenttiń aldynda balalarymen birge otyrǵany esterińizde shyǵar. Osyny kórgen basqa ata-analar maǵan hat jazyp, olar óz balalaryn mundai qaýipti sharalarǵa qatystyrmaý kerektigin aitty", - deidi senator.
Depýtat bul jerde tek kópbalaly analar ǵana emes, áke men sheshe, iaǵni jalpy ata-analar týraly sóz bolyp otyrǵanyn atap ótti.
"Ata-analar, eń aldymen, balalarynyń qaýipsizdigin oilaýy tiis. Árine, olardy da túsinýge bolady, kóbisi sol balalary úshin shyǵyp jatyr. Biraq, balalarǵa, olardyń ómirine qaýip-qater tónbeýi kerek", - dedi Aitpaeva.
Buǵan deiin áleýmettik jelide elordada ótken miting kezinde kámeletke tolmaǵan qyzdyń ustalǵany týraly aqparat taraǵan bolatyn. Keiinirek ishki ister ministrligi onyń jasóspirim emes, 19 jastaǵy qyz ekenin habarlady.
21 qyrkúiekte birneshe qalada ótken zańsyz mitingter kezinde 100 adam ustalǵan.
