Qyzylorda oblysynda 16 jastaǵy qyzdy óltirgen er adam 20 jylǵa bas bostandyǵynan aiyryldy. Sot oǵan qosa 10 mln teńge moraldyq shyǵyn tóleýge mindettedi, dep habarlaidy ult.kz.
Qylmystyq is Qyzylorda oblysynyń qylmystyq ister jónindegi mamandandyrylǵan aýdanaralyq sotynda qaraldy.
Qaiǵyly oqiǵa biyl maýsym aiynda Shieli aýdanynda bolǵan. 2 maýsym kúni keshke 16 jasqa tolmaǵan Balsulý Ómirzaq úiinen shyǵyp ketkennen keiin qaita oralmaǵan. Erteńine onyń denesi Jaqaev kanalynan tabyldy.
Politsiia kúdikti retinde jergilikti turǵyndy ustady. Tergeý barysynda onyń qylmysqa qatysy tolyq dáleldengen.
Sot otyrysynda sottalýshy kinásin moiyndap, jábirlenýshilerden keshirim suraǵan.
Sot ony QR Qylmystyq kodeksiniń 99-baby 2-bóliginiń 14-tarmaǵy, iaǵni kórineý kámeletke tolmaǵan adamdy óltirý boiynsha kináli dep tanydy.
«Qylmys sottalýshynyń kinásin moiyndaýymen, jábirlenýshiler men kýálardyń jaýaptarymen, saraptama qorytyndylarymen, beinetaspalarmen, qylmystyq is materialdarymen jáne zattai dáleldemelermen dáleldendi», – delingen sot habarlamasynda.
Prokýror sottalýshyǵa 20 jyl bas bostandyǵynan aiyrý jazasyn taǵaiyndaýdy suraǵan. Sot bul usynysty qanaǵattandyryp, er adamdy 20 jylǵa bas bostandyǵynan aiyrdy. Ol jazasyn qaýipsizdigi ortasha qylmystyq-atqarý júiesi mekemesinde óteidi.
Sonymen qatar sottalýshydan jábirlenýshilerdiń paidasyna 10 mln teńge moraldyq shyǵyn óndiriletin boldy.
Úkim zańdy kúshine engen joq.
Buǵan deiin qylmysty ashyp, kúdiktini ustaý úshin tájiribeli qyzmetkerlerden jedel-tergeý toby qurylǵany habarlanǵan edi.
