Qazaqstanda tótenshe jaǵdai kezinde 1,6 millionnan astam nesie alýshynyń qaryzdary boiynsha merzimi keiinge shegerildi, - dep habarlaidy QR Qarjy naryǵyn retteý jáne damytý agenttigi.
«QR Qarjy naryǵyn retteý jáne damytý agenttigi halyq pen biznesti qoldaý jónindegi sharalardyń oryndalý monitoringin jalǵastyrýda. 2020 jylǵy 28 sáýirdegi jaǵdai boiynsha ekinshi deńgeidegi bankterge jáne ózge de kredittik uiymdarǵa qaryzdar men mikrokreditter boiynsha tólemderdi toqtata turýǵa 1 844 599 ótinim kelip tústi. Onyń ishinde 1 831 489 jeke tulǵa banktik qaryz tólemderi boiynsha merzimin keiinge qaldyrýǵa ótinim berdi, 13 110 shaǵyn jáne orta kásipkerlik sýbektisi tótenshe jaǵdai kezeńinde kreditter boiynsha merzimdi keiinge shegerýge ótinim berý úshin kredittik uiymdarǵa júgindi», - delingen atalǵan agenttik málimetinde.
Osy oraida 1 661 232 jeke tulǵanyń 237,4 mlrd teńgesi nemese qaryz alýshylardyń 31,3 paiyzy boiynsha tólemdi toqtata turý maquldandy. Onyń ishinde 299 363-i halyqtyń áleýmettik jaǵynan osal toptarynyń ókilderi.
«Sonymen birge, 11 561 shaǵyn jáne orta kásipkerlik sýbektisi 138,8 mlrd teńge somaǵa nemese kásipkerlerdiń jalpy sanynan 44,1 paiyzy nesie merzimin keiinge shegerdi. Qalǵan ótinimder qaralyp jatyr, 10 jumys kúni ishinde olar boiynsha tiisti sheshim qabyldanady», - dep atalyp ótken habarlamada.
Búgingi kúni shamamen 5,3 mln azamattyń 4,4 trln teńge somaǵa, sondai-aq 26,2 myńǵa jýyq shaǵyn jáne orta kásipkerlik sýbektisiniń 3,9 trln teńge somaǵa banktik qaryzdar men mikrokreditter boiynsha bereshegi bar.
