Densaýlyq saqtaý ministri Eljan Birtanov meditsinalyq nysandardyń eskirip, meditsinalyq qurylǵylardyń tozýyna qatysty pikir bildirdi, dep habarlaidy QazAqparat.
«Shynynda da eskirý jaǵdaiy burynnan bar. Bizdiń esebimizshe bul infraqurylymdy qalpyna keltirý úshin zamanǵa sai tehnologiialardy eskermegenniń ózinde 1,5 trillion teńge kerek. Iaǵni 100 paiyzdyq jaraqtandyrý úshin orasan zor qarajat qajet. Bul jerde álbette eń aldymen aýyldy aimaqtar men aýdandyq aýrýhanalarǵa qiyn. Sebebi ol jaqta mamandar beiimdelgen nysandarda jumys isteýge májbúr», - dedi Eljan Birtanov Densaýlyq saqtaý ministrliginiń Facebook paraqshasynda «Habar 24» arnasy tilshisiniń suraǵyna jaýap bere otyryp.
Ministrdiń aitýynsha memleket 2007-2015 jyldary júrgizgen «100 mektep – 100 aýrýhana» baǵdarlamasy aiasynda infraqurylym edáýir jaqsaryp qalǵan. Alaida bul rette ary ketse aýdandyq, oblystyq aýrýhanalar ǵana salynǵan.
«Ókinishke qarai kóp bólik nazardan tys qaldy. Al qazir bul jumysty ary qarai jalǵastyrýdyń mańyzy zor. Eń birinshi kezekte ortalyq aýdandyq aýrýhanalardy bekemdep, ekinshi kezekte oblystyq qalalardaǵy kópbeiindi aýrýhanalarǵa nazar aýdarǵan jón. Ondaǵy kópbeiindi meditsinalyq ortalyqtarǵa ártúrli salanyń mamandaryn integratsiialai alar edik. Bizde qazir ókinishke qarai aýrý tobynyń ár túrine arnalǵan aýrýhana bar. Adam aýyr jaǵdaida emhanaǵa túsken kezde ony emdei alatyn basqa aýrýhanaǵa aparýǵa týra keledi. Munyń arty adamdar úshin aiqyn qaýipke ákelýi yqtimal», - dedi Eljan Birtanov.
Ministr koronavirýs infektsiiasymen betpe-bet kelgen kezde de qiyndyqtar týyndaǵanyn aitady.
«Epidemiia kezinde infektsiialyq emhanalardyń bary úlken artyqshylyq boldy. Alaida kúrdeli patologiiasy bar, pnevmoniiamen adamdar túse bastaǵan kezde ártúrli mamandyqtaǵy dárigerlerdi tartýǵa týra keldi. Bizdegi infektsiialyq aýrýhanalarda kompiýterlik tomograftar da bolmai qaldy. Al bul tomograftar diagnostika jasaýda eń kerekti maman. Sol sebepti ár óńirde kópbeiindi aýrýhana salýdyń mańyzy zor. Belgili bir aýrýmen túsken adamdy basqa aýrýhanalarǵa tasymai, dál sol jerdegi mamandar qaraityndai jaǵdai jasalýy tiis. Bul – álemdik tájiribe», - dep túidi Eljan Birtanov.
Ministr osy sebepti memlekettik baǵdarlama aiasynda iri 20 kópbeiindi aýrýhana salý týraly jumys jospary engizilgenin málim etti.
