Túrkistanda 13 jastaǵy qyzben jynystyq qatynasqa túsip, sottalǵan jigitke elektron bilezik taǵyldy, - dep habarlaidy "Ult aqparat" Polisia.kz saityna silteme jasap.
2020 jyly jeltoqsanda KTK telearnasynyń "Astarly aqiqat" baǵdarlamasynda "13 jasymda zorlandym, 15 jasymda ana atandym" dep Nazakat Rahmetova esimdi turǵyn aqiqatyn izdep, baǵdarlamaǵa shyqqan bolatyn. Kórermenniń jaǵasyn ustatqan qylmystyq oqiǵany talqylaý tórt kúnge sozylǵan edi. "Balamnyń ákesi Hasan" dep jar salǵan qyzdyń ulynyń ákesi basqa adam bolyp shyqty.
Media-portal málimetinshe, búginde sol baǵdarlamada aqiqaty ashylǵan Hasanǵa elektron baqylaý qurylǵysy taǵyldy. Óz qylmysyn moiyndaǵan Hasan Rashidov Túrkistan qalalyq sotynyń úkimimen eki jylǵa shartty túrde sottalǵan. Ol Túrkistan qalalyq probatsiia esebinde jazasyn ótep jatyr.
"Osy baǵdarlamaǵa shyqqanym anama aýyr tidi. Árine, ózim de biraz ýaqyt úiden shyǵa almai qaldym. Bári de kelisimmen boldy. Aqyrynda pedofil atandym. Qatty qynjylamyn. Jasaǵan qateligime ókinemin. Osy jyldyń aiaǵynda jazamdy ótep bitemin. Ózime berilgen ýaqytty aman-esen aiaqtap, jańa ómir bastasam deimin", - dedi sottalǵan Hasan Rashidov.
"Bul elektrondy bileziktiń sottalǵandarǵa baqylaý jasaýǵa, turǵylyqty mekenjaiyn tastap ketpeýge, qaita jasaýy múmkin qylmystyń aldyn alýǵa septigi mol. Bilezik taǵylǵan sottalǵandardy probatsiia inspektorlary arnaiy planshetter arqyly baqylaidy, eger sottalǵan jaza óteý tártibin buzsa nemese bilezikti ózdiginen sheshýge tyryssa, dabyl signaly tárizdi belgi túsedi. Sondai-aq, sottalǵandarda bir nemese eki eskertý bolsa, ol sottalǵandarǵa bilezik kigiziledi. Sottalǵan belgisiz baǵytqa qarai ketse, birden signal túsedi. Elektrondy bilezikti búldirgen jazasyn óteýshiler jaýapqa tartylatyn bolady", – dedi Túrkistan qalalyq probatsiia qyzmetiniń bastyǵy Aqmaral Torlanova.
Onyń sózine qaraǵanda, Túrkistan qalalyq probatsiia qyzmeti Hasan Rashidovten bólek taǵy da bes sottalǵanǵa elektron bilezik taqqan. Alty adamnyń úsheýi pedofil sanatynda, qalǵan úsh sottalǵan qylmysqa beiim bolǵany úshin elektron baqylaýǵa alynǵan. Probatsiia qyzmetiniń inspektorlary atalǵan alty sottalǵandy planshet arqyly qadaǵalap otyrady.
