Elorda politsiiasy «Balapan» telearnasynyń 13 jasar júrgizýshisi Baǵlan Qutjannyń jol-kólik oqiǵasynan mert bolýyna bailanysty tergeý amaldaryn bastady, dep habarlaidy QazAqparat tilshisi.
«10 mamyr kúni saǵat 17:30 kezinde elordadan Qosshy aýyly baǵytyndaǵy, iaǵni «Garden village» kottedj kenti mańynda bolǵan jol-kólik oqiǵasyna qatysty sotqa deiingi tergeý amaldary júrgizilip jatyr. Osy oraida tiisti saraptamalar taǵaiyndaldy. Atalǵan jol apaty saldarynan kámeletke tolmaǵan veloshabandoz aýrýhanaǵa jetkizildi. Ol 16 mamyr kúni alǵan jaraqytynan kóz jumdy», - delingen Politsiia departamentiniń málimetinde.
Qazirgi kezde jol-kólik oqiǵasynyń mán-jaiy anyqtalyp jatyr.
Aita keteiik, osyǵan deiin «Balapan» telearnasynyń áleýmettik jelidegi paraqshasynda Qutjan Baǵlan Ǵalymbekuly ómirden ozǵany habarlanǵan edi.
«Ol bizdiń arnadaǵy «Oilan, tap!», «Biz de bala bolǵanbyz», «Qýyr, qýyr, qýyrmash», «Durys-burys» baǵdarlamalaryn sondai-aq, Qazaq radiosynda «Baldaýren» balalar interaktivti radio oiynyn júrgizgen. Osy jyly naýryz aiynda Sport jáne dene shynyqtyrý isteri komitetiniń tóraǵasy Serik Sápievtiń uiymdastyrýymen ótken qazaqsha kúresten 1 oryn ielengen. Qysqa ǵana ǵumyrynda ónerde ǵana emes sportta da, bilimde de biik jetistikterge jetken. Sport sheberine úmitker bolǵan daryndy balanyń ómiri jeńis pen jetistikke toly boldy. Ata-anasyna, týǵan-týystaryna ujymnyń atynan qaiǵyryp kóńil aitamyz. «balapan» telearnasynyń milliondaǵan kórermenderi seniń jarqyn beineńdi eshqashan umytpaidy. Qosh bol, balaqai!», - dep jazdy telearna ujymy.
