Memleket basshysynyń tóraǵalyǵymen halyqty áleýmettik qorǵaý júiesin jańǵyrtý máselelerine arnalǵan keńes ótti, dep habarlaidy "Ult aqparat" Aqordaǵa silteme jasap.
Jiynda Nursultan Nazarbaevqa Eńbek jáne halyqty áleýmettik qorǵaý ministrligi qyzmetiniń negizgi qorytyndylary, sondai-aq Elbasynyń Qazaqstan halqyna arnalǵan biylǵy Joldaýynda aitylǵan tapsyrmalardyń oryndalý barysy jóninde esep berildi.
Elbasy qazaqstandyqtardyń ál-aýqaty men turmys sapasyn arttyrý Úkimettiń negizgi mindeti sanalatynyn aitty.
– Memleket jyl saiyn áleýmettik salany qarjylandyrý kólemin arttyryp, mindettemelerdiń bárin oryndap keledi. Biyl osy maqsattarǵa 2,6 trillion teńge bólindi. Bul byltyrmen salystyrǵanda 21,3 paiyzǵa kóp, – dedi Qazaqstan Prezidenti.
Memleket basshysy turǵyndardyń turmys sapasy men tabysyn arttyrýǵa arnalǵan biylǵy Joldaýda eń tómengi jalaqy mólsherin kóbeitý úshin keshendi sharalar qamtylǵanyn erekshe atap ótti.
– 2019 jylǵy 1 qańtardan bastap tómen jalaqy alatyn eńbekkerlerdiń, sonyń ishinde azamattyq qyzmetshilerdiń eńbekaqysy 1,5 ese ósedi. Sondai-aq, ákimshilik, kómekshi jáne tehnikalyq qyzmet kórsetetin qyzmetkerlerdiń jalaqysy artady. Ekonomikanyń barlyq salasyndaǵy tómen jalaqy alatyn 1,3 million jaldamaly jumysshylardyń jalaqysy ortasha eseppen 30 paiyzǵa kóbeiedi, – dedi Nursultan Nazarbaev.
Elbasy áleýmettik qamsyzdandyrýdyń memlekettik júiesine ózin-ózi jumyspen qamtyǵan turǵyndardy tartý arqyly jyl basynan beri 2,7 million adamnyń ishinen 1,8 million adam jańa mártebege ie bolatynyn aitty. Memleket basshysy 2019 jyldan bastap Qazaqstannyń jumys isteitin barlyq azamattary úshin Biryńǵai jiyntyq tólem engizý josparlanyp otyrǵanyn atap ótti.
– 2018 jylǵy 1 qańtardan bastap turmysy tómen otbasylar úshin ataýly áleýmettik kómektiń jańa formatyn engizdik. Sonyń arqasynda biylǵy 10 aidyń ishinde 103 myńǵa jýyq otbasy nemese 534 myń adam memlekettik qoldaý sharalarymen qamtyldy, – dedi Qazaqstan Prezidenti.
Sonymen qatar, Memleket basshysy tiisti vedomstvo jetekshisine shaǵyn nesieler sanyn kóbeitý qajettigin jáne olardyń halyqqa qol jetimdiligin arttyrýdyń mańyzdylyǵy týraly aitty.
– Osy jyldyń sońyna deiin eń tómengi jalaqy mólsherin bir jarym ese ósiretin zańnyń qabyldanýyn qamtamasyz etý qajet. Ministrlik jáne ákimdikter jumys berýshilerdiń eń tómengi jalaqy mólsherin arttyrýyn qamtamasyz etý úshin baqylaý ornatyp, tiisti túsindirý jumystaryn júrgizý jóninde sharalar qabyldaýy kerek. 1,3 million azamatymyzdyń jalaqysy naqty kóbeiýge tiis, – dedi Nursultan Nazarbaev.
Elbasy 2019 jyldyń 1 qańtarynan bastap jasyna bailanysty beriletin zeinetaqy tólemderin 7 paiyzǵa, sondai-aq múgedektigi boiynsha jáne asyraýshysynan aiyrylǵan jaǵdaida beriletin memlekettik áleýmettik járdemaqylar kólemin 5 paiyzǵa arttyrý qajet ekenine toqtaldy.
Basqosý barysynda áleýmettik saqtandyrý máseleleri de talqylandy. Osyǵan orai, eńbek qabiletin joǵaltýyna, jumystan bosap qalýyna nemese asyraýshysynan airylýyna bailanysty beriletin áleýmettik tólemaqynyń ortasha kólemin 30 paiyzǵa arttyrýdy qamtamasyz etý kerektigi aityldy.
Qazaqstan Prezidenti múgedekter sanatyna jatatyn azamattardyń ózin-ózi tanytýy jáne tolyqqandy integratsiiasy úshin jaǵdai jasaý maqsatymen Múmkindigi shekteýli adamdardyń quqyqtaryn qamtamasyz etý jáne turmys sapasyn jaqsartý jóninde jańa ulttyq jospar ázirleýdi tapsyrdy. Bul qujat múgedektikke ushyratatyn jaǵdailardyń aldyn alý, keń aýqymdaǵy inkliýzivti bilim berýdi engizý, erekshe muqtaj jandarǵa arnalǵan barlyq áleýmettik jáne kólik infraqurylymyn beiimdeý jónindegi sharalardy, sondai-aq, jumys berýshiler men biznes ókilderiniń múgedekterdi jumyspen qamtý isine belsendi atsalysýyn qamtamasyz etý jónindegi máselelerdi qarastyrýǵa tiis.
Memleket basshysy tsifrlyq ekonomikaǵa jáne 4.0 indýstriiasyna kóshýimizge bailanysty eńbek resýrstarynyń sapasyna qoiylatyn talaptardyń kúsheigenine nazar aýdardy.
– Sapaly jumys oryndaryn ashý úshin eńbek naryǵyn damytýdyń jańa tásilderin ázirleý kerek. 2025 jylǵa qarai qosymsha 2 millionǵa jýyq jas maman eńbek naryǵyna shyǵady dep boljanyp otyr. Jastarymyzdy tiisti jumys oryndarymen qamtamasyz etý mańyzdy, – dedi Qazaqstan Prezidenti.
Jiyn sońynda Nursultan Nazarbaev Prezident Ákimshiligine tapsyrmalardyń oryndalýyn baqylaýǵa alýdy tapsyrdy.
