"Almatyda ótip jatqan boks keshiniń basty jekpe-jeginde otandasymyz Qanat Islam ganalyq boksshy Patrik Alloteimen judyryqtasyp, upai sanymen jeńiske jetti", - dep habarlaidy "Ult aqparat".
Alǵashqy raýndta qos boksshy birin-biri zerttep, osal tustaryn baǵamdap kórgenmen, kezdesýdiń qalǵan bóligi jerlesimizdiń basymdylyǵymen ótti. Birinshi nómirmen judyryqtasqan boksshymyz Alloteidi buryshtan-buryshqa tyqsyryp, sát saiyn óz shabýyly men joiqyn soqqylaryn údete túsken. Áitkenmen ganalyq bahadúr kezdesýdiń sońyna deiin shydas berip, laiyqty qarsylyq tanyta aldy.
Osylaisha, "Qazaq" búgingi jeńisiniń arqasynda WBA Fedelatin jáne WBO Intercontinental altyn belbeýin ielenip otyr.
Esterińizge sala keteiik, Qanat Islam búginge deiin 21 kezdesý ótkizip, barlyǵynda jeńiske jetken. Onyń 18-in nokaýtpen utqan. Ol aldynǵy kezdesýinde WBA Fedelatin nusqasy boiynsha Amerika aimaǵy chempiony ataǵyn qorǵap qalǵan. Bul onyń kásipqoi ringte qol jetkizgen alǵashqy jáne ázirshe jalǵyz belbeýi bolǵan edi. Patrik Allotei de tájiribeli boksshy. Osyǵan deiin kásipqoi sharshy alańda 36 jekpe-jek ótkizgen. Onyń 34-de qarsylastarynan basym túsken: 24-de qarsylastaryn nokaýtpen utsa, 2 jekpe-jeginde ǵana qarsylastaryna ese jibergen. Kezdesýleriniń barlyǵyn derlik Ganada ótkizgen. Úsheýi ǵana ózge elde ótken. Kásipqoi boksta "Ýly jebe" degen laqap atqa ie.
Salmaq ólsheý rásiminde eki boksshynyń da salmaǵy 68 kelini kórsetken bolatyn.
Ult portaly
