Foto: Polisia.kz
Respýblika aýmaǵynda “Migrant” jedel-profilaktikalyq is-sharasy ótkizildi, – dep habarlaidy «Ult aqparat» Polisia.kz-ke silteme jasap.
Bes kúnde kóshi-qon zańnamasyn buzýdyń 10 myńnan astam deregi anyqtaldy. – elde bolý erejelerin buzǵany úshin 4475 sheteldik; – zańsyz jumys istegeni úshin 2118 sheteldik; – 613 jumys berýshi sheteldik jumys kúshin zańsyz paidalanǵany úshin; – 2624 jeke jáne zańdy tulǵa ózderimen birge júrgen sheteldikter týraly politsiiaǵa der kezinde habar bermegeni úshin jaýapkershilikke tartyldy.
Sonymen qatar qos azamattyqtyń 9 faktisi anyqtaldy, sheteldikterge elde turýǵa berilgen 113 yqtiiarhat kúshin joidy. Kóshi-qon zańnamasyn buzǵandardy elden shyǵarý týraly 850 sot sheshimi shyǵaryldy. 121 sheteldik elden májbúrlep shyǵaryldy. Barlyq deportatsiialanǵandarǵa bes jylǵa Qazaqstanǵa kirýge tyiym salynady. Izdeýde júrgen 37 sheteldik ustaldy. Kóshi-qon qyzmeti elge sheteldikterdi shaqyratyn qazaqstandyqtarǵa shaqyrylǵan sheteldik azamattardyń elden ýaqytyly ketýin uiymdastyrý qajettigin eske salady. Qaýipsizdik pen qoǵamdyq tártiptiń saqtalýyn qalaityn azamattardyń arqasynda politseiler birqatar zań buzýshylyqtardy anyqtady. Mysaly, Almatyda jeke jataqhana iesi jataqhanada turatyn kúdikti adamdar týraly kóshi-qon qyzmetine aryzdanǵan.
Tekserý barysynda 30 sheteldiktiń kelý merzimin buzǵany anyqtaldy. Politseiler kóshi-qon zańnamasyn buzý faktileriniń aldyn alý jáne anyqtaý jumystaryn jalǵastyrýda.
