Foto: Polisia.kz
IIM esirtki qylmysyna qarsy is-qimyl departamenti Aqmola oblysynyń politsiia departamentimen jáne Qarjy monitoringi agenttigimen birlesip, prokýratýramen kelisilgen uzaqmerzimdi ázirleý men jedel-tergeý is-sharalarynyń kesheni barysynda esirtki satýmen ainalysqan uiymdasqan toptyń áreketin toqtatty, – dep habarlaidy Polisia.kz saity.
"Ótken demalys kúnderi arnaiy qurylǵan jedel-tergeý toptary arnaiy maqsattaǵy bólimshe jaýyngerleriniń kúshtik qoldaýymen Astana, Qaraǵandy jáne Kókshetaý qalalarynyń aýmaǵynda osy qylmystyq bizneske qatysýshylardy ustady.
Jedel ýákilder Astana, Kókshetaý jáne Qaraǵandy qalalarynyń aýmaǵynda esirtkini jasyryp ketý arqyly taratýmen ainalysqan 12 adamdy anyqtady. Olar “Telegram” qosymshasynda jumys isteitin úsh internet-dúken arqyly áreket etken.
Olardyń qatarynda uiymdastyrýshy, operator, býhgalter, internet-esirtki dúkeniniń ákimshisi, sondai-aq 7 esirtki jasyryp ketýshi (“ólshep, oraýshylar”, “qoimashylar”, “kladmender”) bar" - delingen habarlamada.
IIM baspasóz qyzmeti málimetinshe, 12 mekenjai boiynsha júrgizilgen tintý nátijesinde 3 keliden astam gashish, sonymen qatar daiyn oramdar, esirtkini býyp-túiýge jáne qoldanýǵa arnalǵan túrli qurylǵylar, qylmystyq bizneske qatysty qujattamalyq rastamasy bar tehnika men uialy telefondar, sondai-aq internet-dúkenderdiń qarajat qozǵalysy týraly jazbalar tárkilengen.
Ustalǵan esirtki jasyrýshylardyń qatarynda Kókshetaý qalasynyń 17 jastaǵy turǵyny da bar. Sonymen qatar, jedel ýákilder esirtki jasyrýshylardyń biriniń anasyn, iaǵni toptyń qylmystyq biznesine qatysy bar 42 jastaǵy áieldi ustaǵan.
"Qazirgi tańda ýaqytsha ustaý izoliatoryna qylmystyq toptyń 10 múshesi qamaýǵa alyndy. Eki adamǵa qatysty “kelý týraly mindetteme” protsessýaldyq májbúrleý sharasy qoldanyldy.
QR QK-niń 297-baby 3-bóligi boiynsha sotqa deiingi is júrgizý bastaldy (Esirtki zattaryn ótkizý maqsatynda zańsyz daiyndaý, saqtaý, tasymaldaý nemese ótkizý).
Adamdar tobynyń aldyn ala sóz bailasýymen birneshe ret, asa iri mólsherde, elektrondyq aqparattyq resýrstardy paidalaný arqyly jasalǵan bul qylmystar úshin múlki tárkilenip, on jyldan on bes jylǵa deiingi merzimge bas bostandyǵynan aiyrý jazasy qarastyrylady.
Tergeý sharalary jalǵasýda. Tiisti saraptamalar taǵaiyndaldy", – dedi QR IIM Esirtki qylmysyna qarsy is-qimyl departamenti bastyǵynyń orynbasary Asqar Muhametqaliev.
