Qazaqstan IIM-niń suraýy boiynsha Grýziia astanasy Tbiliside halyqaralyq izdeýde júrgen 39 jastaǵy qazaqstandyq azamat ustaldy. Qazir ony Qazaqstanǵa ekstraditsiialaý máselesi qarastyrylyp jatyr, dep habarlaidy ult.kz.
Tergeý dereginshe, er adam Atyraýdaǵy avtosalondardyń birinde menedjer bolyp jumys istep, azamattardy «kólik alyp beremin» degen ýádemen aldap kelgen. Ol klientterden tikelei aqsha alyp, mindettemesin oryndamaǵan.
2022 jyldyń tamyzynda ol eki avtokólik úshin satyp alýshydan 37 million teńge alǵan. Keiin 2023 jyldyń aqpanynda dál osyndai tásilmen taǵy eki azamatty 81 million teńgege aldaǵan. Jalpy keltirilgen shyǵyn 118 million teńgege jetken.
Buǵan deiin Astanada Land Cruiser satyp almaq bolǵan turǵyn 20 million teńgesinen aiyrylǵany habarlanǵan edi.
