«Astana meditsina ýniversiteti» AQ-ǵa túsý úshin IELTS sertifikatyn satyp alǵan 100-den astam stýdent oqýdan shyǵaryldy, dep habarlaidy 24.kz.
Esterińizge salaiyq, byltyr kúzde emtihandy óz kúshimen tapsyrǵandar aryzdanyp, bul is boiynsha tekseris júrgizilgen edi. Sonyń nátijesinde aǵylshyn tili emtihany boiynsha 117 tirkelmegen sertifikat anyqtaldy.
IELTS sertifikaty magistratýra nemese doktorantýraǵa túsý kezinde basymdyq beredi. Sol sebepti byltyr kóp adam bul qujatty satyp alǵan. Alaida barlyq synaqtan óz kúshimen ótkender emtihan nátijesimen kelispei, bul máselege qoǵam nazaryn aýdarýǵa tyrysty. Nátijesinde QR Bilim jáne ǵylym ministrligi tekseris júrgizip, bazada tirkelmegen 117 sertifikat bar ekendigin anyqtady.
«Bilim jáne ǵylym ministrliginiń komissiiasy eki ret tekseris júrgizdi. Basynda biz 33 balany shyǵardyq. Jaqynda taǵy 84 stýdent oqýdan shettetildi. Endi bul azamattar olardyń oqýyna jumsalǵan qarjyny qaitarýy tiis. Olardyń kóbi grantta oqydy. Tek 9 adam ǵana aqyly túrde bilim aldy», - deidi «Astana meditsina ýniversiteti» AQ rektorynyń orynbasary Frants Galitskii.
Bul oqiǵany tergeý qalalyq Ishki ister departamentine júkteldi. Nátijesinde 117 qylmystyq is qozǵaldy. Onyń 30-y sotqa jiberildi.
«385-baptyń 3-bóligi, iaǵni jalǵan qujatty paidalaný isi boiynsha 300 ailyq eseptik kórsetkish kóleminde aiyppul taǵaiyndalady. Sonymen qatar qamaýǵa alý nemese qoǵamdyq jumystarǵa tartý da qarastyrylǵan», - deidi Saryarqa aýdandyq №2 sotynyń sýdiasy Bolat Pazylov.
Qazir oqýdan shyǵyp qalǵan stýdentterdiń orny bos. Endi emtihandy óz kúshimen tapsyrǵandar osy granttardy ielenýden úmitti.
«Ókinishke qarai, biz bul máseleni óz betimizben sheshe almaimyz. Ol úshin Bilim jáne ǵylym ministrligi birqatar qujatty retteý kerek. Sonyń negizinde aqsha tólep oqyp jatqandardy osy bos oryndarǵa aýystyramyz», - deidi «Astana meditsina ýniversiteti» AQ rektorynyń orynbasary.
Jalǵan sertifikat satyp alǵan stýdentterdiń bári oqýdan kúzde shyǵarylýy tiis edi. Biraq sottyń bul sheshimi ýaqtyly oryndalmaǵan. Mundai jaǵdaida meditsina mamandaryn daiarlaityn oqý ordasy litsenziiasynan aiyrylýy da múmkin.
