QR Ulttyq ekonomika ministri Rýslan Dálenov óńirlerdiń ekonomikalyq damý kórsetkishteri týraly aityp berdi, dep habarlaidy "Ult aqparat".
«Óńirlerde 7 ekonomikalyq kórsetkish boiynsha jalpy jaǵdai kelesidei. 5 kórsetkish boiynsha 11 óńirde ósý baiqalady. Olar: Aqmola, Aqtóbe, Almaty, Jambyl, Qostanai, Mańǵystaý, Pavlodar, Soltústik Qazaqstan jáne Túrkistan oblystary jáne Nur-Sultan men Shymkent qalalary. Saýda boiynsha jaǵdai jaqsaryp kele jatqanyn atap ótkim keledi. Oń aimaqqa 2 óńir shyqty. Olar Nur-Sultan jáne Shymkent qalalary.
Úsh óńirde 4 kórsetkish boiynsha ósý tirkeldi. Bul ortasha deńgei. Taǵy 3 óńirde 1-2 kórsetkish boiynsha ǵana ósý baiqalady. Olar – Qyzylorda, Batys Qazaqstan jáne Atyraý oblystary», - dedi Rýslan Dálenov Úkimet otyrysynda.
Sonymen birge, Qazaqstanda qurylys sektory óte joǵary ósýdi kórsetip otyr. Oryndalǵan jumystardyń kólemi 12,1%-ke ósken.
«Belsendi qurylys jumystary Túrkistan (83,6%) jáne Jambyl (49,1%) oblystarynda, Shymkent qalasynda (59,3%) baiqalady. 12,1 mln sharshy metr turǵyn úi paidalanýǵa berildi. Bul ótken jyldyń sáikes kezeńimen salystyrǵanda 9,3%-ke joǵary», - deidi ministr.
