Sýret: muftyat.kz
Saýd Arabiiasy Koroldiginiń qoǵamdyq qaýipsizdik qyzmeti qajylyq tártibin buza otyryp, zańsyz qajylyqqa barǵan azamattarǵa aiyppul sala bastady, dep habarlaidy "Ult aqparat" Qazaqstan musylmandary dini basqarmasynyń resmi saityna silteme jasap.
Qazaqstan musylmandar dini basqarmasynyń baspasóz qyzmetiniń Saýd Arabiiasy Koroldiginiń memlekettik aqparat agenttigine súienip habarlaýynsha, qajylyq jasaýǵa jáne ruqsatty zańsyz alýǵa tyiym salý saiasaty qamtylǵan aimaqtarǵa:
- Mekke qalasy;
- ortalyq aimaq;
- qasietti jerler;
- Haramain temirjol stantsiiasy;
- baqylaý-ótkizý pýnktteri;
- tekserý ortalyqtary jáne ýaqytsha baqylaý beketteri kiredi.
Ruqsatsyz qajylyq paryzyn óteýge tyiym salý týraly Ereje 2024 jylǵy 20 maýsymǵa deiin kúshinde bolmaq.
"Kez kelgen adamǵa – azamattar, turǵyndar nemese kelýshilerge qajylyq erejelerin buzǵany úshin 10 myń saýdiialyq rial (2666 AQSh dollary) aiyppul salynady, al azamattyǵy joqtar óz elderine deportatsiialanady jáne belgili bir merzimge deiin Koroldikke qaita kirýge tyiym salynady", - delingen habarlamada.
Sondai-aq QMDB aqparaty boiynsha, qajylyq tártibin buzǵandardy ruqsatsyz tasymaldaǵan adam 6 aiǵa deiin bas bostandyǵynan aiyrý jazasyna kesilmek, sonymen qatar oǵan 50 myń rialǵa deiin (13 328 AQSh dollary) aiyppul salynady, al tasymaldaýǵa paidalanylǵan kóligi tárkilenedi.
Saýd Arabiia Koroldigi qoǵamdyq qaýipsizdiginiń málimetine sáikes, eger zań buzýshy rezident bolsa, ol jazasyn ótegennen keiin deportatsiialanady jáne zań aiasynda oǵan belgili bir merzimge deiin memleketke qaita kirýine tyiym salynady.
"Tasymaldanǵan adam sanyna bailanysty tártip buzýshylarǵa salynatyn aiyppul mólsheri ósedi", - dep jazdy QMDB baspasóz qyzmeti.
