Qazaqstandyqtardyń jeke málimetteriniń taralýyna qatysty QR Ishki ister ministrligi tergeý jumystaryn júrgizýde, dep habarlaidy "Ult aqparat" ministrliktiń baspasóz qyzmetine silteme jasap.
«Ishki ister ministrligine sheteldik serverlerde qazaqstandyqtardyń jeke derekteriniń taralý faktisi boiynsha sharalar qoldaný týraly «TsARKA» (Kiber shabýyldardy tergeý jáne taldaý ortalyǵy) zańdy tulǵalar birlestiginen shaǵym tústi.
Osy aqparatty tekserý úshin ishki ister organdary QR QK 211-baby 1-bóligi (Qoljetimdiligi shektelgen elektrondyq aqparattyq resýrstardy quqyqqa syiymsyz taratý) boiynsha sotqa deiingi tergeý jumystaryn bastady», delingen habarlamada.
Ministrliktiń málimetinshe, qazirgi kezde atalǵan derekqordyń ieleri men derekterdi taratqandardy anyqtaý boiynsha jedel sharalar jáne tergep-tekserý júrip jatyr.
Eske sala ketsek, keshe «TsARKA» ZTB Facebook-tegi paraqshasynda 11 mln qazaqstandyqtyń jeke málimetteriniń taralýyna qatysty QR IIM-niń resmi hatyn jariialady. Aita keterligi, QR Ortalyq sailaý komissiiasy óz serverlerinen derekterdiń taralyp ketýin joqqa shyǵarǵan bolatyn.
