11 kúnniń ishinde dári-dármek pen meditsinalyq buiymdar satý salasynda 396 quqyq buzýshylyq anyqtaldy. Bul týraly QR Qaýipsizdik keńesi apparatynan málim etti, dep habarlaidy "Ult aqparat".
Memleket basshysynyń qatysýymen ótip, jartyjyldyqtyń qorytyndysy shyǵarylǵan Úkimettiń keńeitilgen otyrysynda koronavirýs infektsiiasy indetimen kúreske bailanysty talailar syn tezine de ushyrady. Aýrýǵa shaldyqqandar sanynyń qarqyndy ósýiniń aiasynda qajetti dári-dármek tapshylyǵy eldiń ulttyq qaýipsizdik júiesine aitarlyqtai qater tóndirdi.
Bireýler úshin aýrý - bul qajetti dári-dármekti taba almaý jáne jaqyndarynan aiyrylý bolsa, al endi bireýlerge - óz otandastarynyń esebinen bailyqqa jetý, dúnie tabý boldy. Áleýmettik jelilerde Qazaqstan tótenshe jaǵdai kúnderinde shetelderden alǵan gýmanitarlyq kómektiń dárihanalardy satylyp jatqany, sonymen qatar dári-dármek tapshylyǵy qoldan jasalǵany jáne olardy aitarlyqtai joǵary baǵamen alaiaqtyq jolmen saýdalanatyndyǵy týraly aqparat tarap ketti.
Árine, mundai jait Memleket basshysynyń da tyńǵylyqty nazarynan tys qalǵan emes.
«Qazir biz soǵysta júrmiz. Sondyqtan árbir basshydan jedel máseleler men tapsyrmalardy sheshýde barynsha tiimdilik talap etiledi», - dedi Qasym-Jomart Toqaev.
Prezident naqty sheshimder men áreketterdi quqyq qorǵaý qurylymdarynan da talap etti. Dári-dármek men meditsinalyq buiymdar ainalymyn baqylaý QR Prezidenti Ákimshiliginiń úilestirýimen Qaýipsizdik keńesiniń apparatyna júkteldi.
Búkil el aýmaǵynda shuǵyl túrde farmatsevtikalyq uiymdar qyzmetiniń Densaýlyq saqtaý ministriniń dárilik zattardy bólshek saýdada satýǵa arnalǵan shekti baǵa týraly buiryǵy talaptaryn oryndaýyna qatysty tekserý bastalyp ketti.
Qazirgi ýaqytta baǵany negizsiz kóterýden bólek dári-dármekti tirkeýsiz, litsenziiasyz jáne ózge de ruqsat qujatynsyz tipti dárihanalar, internet-resýrstar, áleýmettik jeliler jáne messendjerler arqyly satý faktileri anyqtalyp jatyr.
11 kúnniń ishinde, 5-16 shilde aralyǵynda Qarjy ministrliginiń Ekonomikalyq tergeýler qyzmeti, IIM jáne UQK Shekara qyzmeti dárilik zattar men meditsinalyq maqsattaǵy buiymdardy satý salasynda 396 zań buzýshylyqty anyqtady. Onyń 76-sy Qylmystyq kodeks baptaryna sai keledi. Tárkilengen dárilik zattardyń barlyǵy QR Densaýlyq saqtaý ministrliginiń Taýarlar men kórsetiletin qyzmetterdiń sapasy men qaýipsizdigin baqylaý komitetine beriledi. Odan ary patsientterdi emdeý barysynda qoldanylatyn bolady.
Qazirgi ýaqytta Sybailas jemqorlyqqa qarsy is-qimyl agenttigi «Meditsinalyq saqtandyrý qory» UAQ laýazymdy tulǵalarynyń biýdjet qarajatyn urlaýy, jekelegen azamattardyń meditsinalyq maskalardy iri kólemde zańsyz satýy, sonymen qatar meditsinalyq uiymdardyń jekelegen basshylarynyń iri kólemde biýdjet qarajatyn urlaýǵa tyrysýy faktileri boiynsha qylmystyq isti tergep jatyr.
QR Qarjy ministrliginiń Ekonomikalyq tergeýler qyzmeti koronavirýspen kúreske bólingen memlekettiń aqsha qarajatyn iri kólemde alaiaqtyqpen urlaý faktisi boiynsha qylmystyq isti tergeýde.
Buǵan qosa, Prezident Ákimshiligi jáne Qaýipsizdik keńesi apparatynyń birlesken bastamasymen quqyq qorǵaý organdary koronavirýspen kúreske baǵyttalǵan sheteldik gýmanitarlyq júkterdiń maqsatty ári tiimdi paidalanýyna tekserýdi bastady.
Dárilik zattardy jasyryp qalý, baǵa ymyralasý, gýmanitarlyq kómekpen kelgen dárilerdi qaita satý nemese emdeý mekemesinen urlaý jaittarynyń jolyn kesýge baǵyttalǵan sharalar jalǵasyp jatyr.
