Halyq aǵartý komissariaty bilim jáne ǵylym, mádeniet, sport, týrizm, baspasóz siiaqty birneshe ministrliktiń qyzmetin atqardy. Bul jaiynda «Qazaq Respýblikasynyń 100 jyldyǵy jáne onyń qurylýyna «Alash» qairatkerleriniń qosqan úlesi» atty onlain konferentsiiada aityldy, dep habarlaidy QazAqparat.
«1920 jyly Orynborda Qazaq avtonomiiasynyń birinshi sezi ótti. Sol quryltaida basshylar taǵaiyndaldy. Sol kezde ulttyq komissariattar, qazirgi tilmen aitqanda ministrlikter quryldy. Ádilet ministrligi, Ishki ister ministrligi, Densaýlyq ministrligi, Jer ministrligi quryldy. Osynyń ishinde qazaq halqynyń rýhaniiatyna jumys istegen ministrlik – Halyq aǵartý komissariaty boldy. Ol bilim jáne ǵylym, mádeniet, sport, týrizm, baspasóz siiaqty birneshe ministrliktiń qyzmetin atqardy. Alǵashqy Halyq aǵartý komissary – Ahmet Baitursynov edi. Ol 1920 jyldyń qazanynan 1921 jyldyń qazan aiyna deiin bir jyl qyzmet atqardy. Ahmet Baitursynovty qosqanda 12 halyq aǵartý komissary boldy. Olardyń bári 1-2 jyldan qyzmet atqardy. Sonyń ishinde bireýiniń ǵana taǵdyry belgisiz, qalǵan 11-i Sovet Úkimetiniń qolynan qaza tapqan», - deidi filologiia ǵylymdarynyń doktory, professor Ǵarifolla Ánes.
Onyń aitýynsha, ár halyq aǵartý komissarynyń sol salady etken eńbegi zor.
«Qazaq halqynyń rýhaniiaty úshin ter tókken komissarlardyń bári repressiiaǵa ushyrady. Jas urpaqqa barlyq shyndyqty aitý kerek. «Aq jol» demokratiialyq partiiasy Á.Bókeihanovtyń 30 tomdyǵyn, entsiklopediiasyn, Alash qairatkerleriniń kitabyn shyǵardy. Sol úshin alǵys aitamyz», - deidi ol.
Eske sala keteiik, atalǵan sharany «Aq jol» demokratiialyq partiiasy «Alash» institýtymen birge uiymdastyrǵan bolatyn.
