Biyldan bastap meditsinalyq JOO túlekteriniń bilimin tekseretin táýelsiz baǵalaý júiesi engizilgen. 11 túlek bul synnan óte almai, diplomsyz qalǵan, dep habarlaidy QazAqparat.
QR Densaýlyq saqtaý ministri Eljan Bitanovtyń aitýynsha, mundai júie meditsinalyq eńbek naryǵyn kezdeisoq kadrlardan saqtaidy.
«Biz jańa talap engizdik. Meditsinalyq oqýǵa túsý úshin biyldan bastap qosymsha emtihan engizdik. Talapker meditsina mamandyǵyna psihologiialyq turǵyda sai ekenin test tapsyrý arqyly dáleldeýi tiis. Bul da - álemde bar praktika. Biyldan bastap joǵary oqý ornynyń túlekteri diplom ǵana alyp qoimai, bilimdi tekserýdiń táýelsiz saraptamasynan ótedi. Sol úshin arnaiy baǵalaý ortalyǵy jumys isteitin bolady. Eger túlek bilimin dáleldei almasa, diplom berilmeidi. Biyldyń ózinde 11 túlek óz bilimin dáleldei almai, diplomsyz qaldy. Endi olarǵa bir jyl ishinde qaita emtihan tapsyryp, diplomǵa laiyq ekenin kórsetý qajet. Osy arqyly meditsina eńbek naryǵyna ótýdiń sharttary qatańdatylyp otyr. Áitpese, qazir kóptegen oqý oryndary stýdentteriniń barlyǵy diplom alyp ketýine múddeli bolyp alǵan», - dedi vedomstvo basshysy.
Ortalyq kommýnikatsiialar qyzmetinde ótken brifingte Eljan Birtanov biyldan bastap bolashaq dárigerlerdiń nege 6 jyl ǵana oqitynyn túsindirdi.
«Biz meditsina mamandyǵyna oqýshylardyń merzimin 7 jyldan 6 jylǵa qysqartamyz. Buryn 5 jyl bakalavr, 2 jyl internatýra negizderin úirense, endi «5+1» júiesi qoldanylady. Bir jaǵynan, biz oqytý protsesin birizdendiremiz. Basy artyq teoriialyq pánderdi alyp tastaimyz. Osynyń arqasynda zamanaýi bilim tehnologiialarynyń kómegimen dárigerlerdi jyldam daiyndaityn bolamyz. Ekinshi jaǵynan, bul tásil halyqaralyq standarttarǵa da, Bolon protsesiniń oqytý júiesine de tolyǵymen sáikes keledi», - dedi ol.
Ministr biylǵy meditsina túlekteriniń teń jartysyna jýyǵy aýyldyq jerlerge jiberilgenin de aitty.
«Buǵan deiin meditsina salasyna bólinetin oqý granttarynyń sany shynaiy qajettilikke sáikes bolmaǵanyn anyqtadyq. Biyldan bastap biz ony óńirlerdiń qajettiligine sai qaita rettedik. Al biylǵy túlekterdiń 48 paiyzy aýyldarǵa jiberildi. Byltyr 700 túlek aýylǵa barsa, biyl 2000 túlek aýylda jumys bastaityn bolady. Jergilikti ákimdikter baspana men áleýmettik qamsyzdandyrý boiynsha barlyq mindetin atqaryp jatyr», - dedi Eljan Birtanov.
