Qarjylyq monitoring agenttiginiń Túrkistan oblysy boiynsha departamenti memlekettik sýbsidiialardy zańsyz iemdendi degen kúdikke ilingen topqa qatysty tergeýdi aiaqtap, qylmystyq isti sotqa joldady, dep habarlaidy ult.kz.
Tergeý nusqasyna sáikes, kúdiktiler zańsyz shemany júzege asyrý úshin úshinshi tulǵalardyń atyna tirkelgen tórt jeke kásipkerlikti, sondai-aq «Nur-Keles» JShS men «Bimen S.» JShS-in paidalanǵan. Atalǵan kásipkerlik nysandarynyń is júzindegi baqylaýy elektrondyq tsifrlyq qoltańbalar, mórler jáne bank shottaryn basqarýǵa múmkindik beretin notarialdy senimhattar arqyly kúdiktilerdiń qolynda bolǵan.
Agenttik málimetinshe, osy kásipkerlik nysandary arqyly aqparattyq júielerge aýyl sharýashylyǵy janýarlaryn satyp alý, olardyń sany jáne asyldandyrý jumystary júrgizilgeni týraly kórineý jalǵan málimetter engizilgen. Keiin sol derekter negizinde memlekettik sýbsidiia alýǵa elektrondy ótinimder berilgen.
Biýdjetten alynǵan qarajat keiin qolma-qol aqshaǵa ainaldyrylyp, shemaǵa qatysýshylar arasynda bólingen jáne jeke maqsattaryna jumsalǵan degen kúdik bar.
Tergeý deregine sáikes, memleketke keltirilgen zalaldyń jalpy kólemi 103 mln teńgeni quraǵan. Qarajat aýyl sharýashylyǵy taýaryn óndirýshilerdi qoldaýǵa jáne óńirdegi mal sharýashylyǵyn damytýǵa arnalsa da, tergeý nusqasy boiynsha maqsatsyz paidalanylǵan.
Sot sanktsiiasymen kúdiktilerdiń múlkine tyiym salynǵan. Tizimde eki turǵyn úi, tórt avtokólik, avtoturaq orny jáne jer telimi bar.
Kúdiktilerdiń bireýi qamaýǵa alynǵan, al ekinshisine kepil túrindegi bultartpaý sharasy qoldanylǵan.
Qylmystyq-protsestik kodekstiń 201-babyna sáikes, istiń ózge mán-jailary ázirge jariialanbaidy.
