2022 jyldyń 15 mamyrynda qazaqtan shyqqan tuńǵysh ushqysh áiel, Uly Otan soǵysynyń ardageri Hiýaz Dospanovanyń týǵanyna 100 jyl boldy. Ol 588-inshi túngi mezgilde jaý shepterin bombalaityn áielder aviapolkiniń quramynda soǵysqan. Ońtústik maidanda, Soltústik Kavkazda, Zakavkazede, Ýkrainada jáne Belarýste jaýyngerlik mindetter oryndady, - dep habarlaidy Tengrinews.kz agenttigi.
Uly Otan soǵysyndaǵy erligi men batyldyǵy úshin Hiýaz Dospanova Qyzyl Juldyz, II dárejeli Otan soǵysy, Qyzyl Tý ordenderimen, "Kavkazdy qorǵaǵany úshin", "Varshavany azat etkeni úshin", "Germaniiany jeńgeni úshin" medaldarymen jáne basqa da jaýyngerlik nagradalarmen marapattaldy. Qazaqstan Prezidentiniń Jarlyǵymen Jeńistiń 60 jyldyǵy qarsańynda oǵan "Halyq Qaharmany" ataǵy berildi. Uly Otan soǵysynyń ardageri 2008 jyldyń 20 mamyrynda qaitys boldy.
1941 jyldyń qazanynda KSRO tarihyndaǵy bombalaýshy áielderdiń jalǵyz aviatsiialyq polki quryldy. Polk 17 men 22 jas aralyǵyndaǵy 115 qyzdan turdy. Aldymen olar Engelste oqyp, 1942 jyldyń mamyrynda alǵash ret áskeri shabýylǵa qatysty. Áielder ushqyshtar men shtýrmandar ǵana emes, mehanik pen tehnik te boldy. Fashister olardy Nachthexen ("Túngi mystandar") dep ataǵan. Ushqyshtardyń taktikasy erekshe boldy - olar nysanaǵa belgili bir qashyqqa ushyp kelip, keiin ushaq shyǵarǵan shýdy azaitý úshin qozǵaltqyshtardy sóndiredi de, aqyryndap ushaqty túsirgen, sol kezde jaý olardy baiqamai turǵan sátte qarsylasyna bomba tastaǵan. Estilgen jalǵyz dybys sypyrǵyshtyń dybysyna uqsaǵan eken. Áýedegi shabýyldar arasyndaǵy úzilister 5-8 minýt boldy, keide túnde ekipaj jazda 6-8 ret, al qystyń uzaq túnderinde 10-12 ret shabýyldaǵan.
Polk shtýrman-snaiperi, qazaqtan shyqqan tuńǵysh ushqysh áiel Hiýaz Dospanova 300-den asa áýe shabýylyna qatysqan.
