«Rýhani jańǵyrý» qazaqstandyq qoǵamdyq damý institýty «Qazaqstannyń 100 jańa esimi» jobasynyń IV maýsymyna qatysyp jatqan arýlar týraly málimet usyndy, dep habarlaidy "Ult aqparat".
«100 jańa esim» tizimine enýge úmitti arýlar:
Indira Edilbaeva
Ulttyq jobaǵa qatysýshylar arasynda qazaqstandyq ánshi Indira Edilbaeva bar. Boijetken «Ýkraina daýysy» (2020 j.) jáne «Qazaqstan daýysy» (2015 j.) vokaldyq televiziialyq shoýlarynyń finalisi bolǵan. Ol Qudaibergen Jubanov atyndaǵy Aqtóbe óńirlik ýniversitetiniń aǵylshyn jáne nemis tilderi boiynsha aýdarma fakýltetin bitirgen.
Ardana Botai
Aǵa leitenant Ardana Botai – Sý-30 SM joiǵysh ushaǵyn tizgindeitin álemdegi jalǵyz arý. Qazaqstan Áýe qorǵanysy kúshteri quramynda qyzmet atqaryp jatqan jyldar ishinde ol An-26, L-39 jáne Sý-30 sm ushaqtaryn basqarýdy meńgergen. Kúndelikti ómirde Ardana mýzyka tyńdaǵandy, kitap oqyǵandy jáne sportpen shuǵyldanǵandy unatady.
Mýza Sháimerdenova
Mýza búginde halyqtyń osal toptarynyń áleýmettik máselelerin sheshýge eleýli úles qosyp júr. Birneshe jyldan beri qaiyrymdylyqpen ainalysyp keledi. Janashyr adamdardyń kómegimen qazaqstandyq otbasylarǵa qoldaý kórsetildi. Nátijesinde, muqtaj jandar azyq-túlik, dári-dármek, jihaz, tehnika jáne balalar arbalaryn aldy.
Zalina Alieva
Boijetken - «Bart» bi ansambliniń, «Vainah» sheshen-ingýsh etno-mádeni birlestigi jastar qanatynyń jáne Batys Qazaqstan oblysy Báiterek aýdany Michýrin aýyldyq okrýginde jastar keńesiniń jetekshisi. Zalina óz salasyndaǵy úzdik eriktilerdiń qataryna kiredi. Qazaq, sheshen, orys, arab jáne grýzin tilderin erkin meńgergen. Belsendi azamattyq ustanymy jáne úlken qoǵamdyq jumysy úshin kóptegen respýblikalyq jáne halyqaralyq marapattarǵa ie bolǵan.
Evgeniia Pavel
Evgeniia «Lider.kz» eriktiler qozǵalysynyń úilestirýshisi. Ol túrli qoǵamdyq jáne qaiyrymdylyq qorlarymen birge kópbalaly jáne az qamtylǵan otbasylarǵa, múgedekterge jáne ómirlik qiyn jaǵdaiǵa tap bolǵan adamdarǵa azyq-túlik kómegin kórsetedi. Búginde «Semei Otbasy ortalyǵy» qoǵamdyq qorymen tyǵyz jumys isteidi. Pandemiia kezinde belsendi azamattyq ustanymyn kórsetip, sýpermarketterde muqtaj jandarǵa arnalǵan mobildi jetkizý jáne býyp-túiý toptaryn qurdy. Sonymen qatar, 1500-den astam otbasyn azyq-túlik taýarlarymen, zattarmen, otynmen jáne kómirmen qamtamasyz etýge kómektesti. Evgeniia túrli marapattar jáne medaldarmen, sondai-aq Qazaqstan Respýblikasynyń Prezidenti Qasym-Jomart Toqaev taǵaiyndaǵan «Halyq alǵysy» medalimen marapattaldy.
Satima Ahmetqalieva
1990 jyldan Egindikól ortalyq kitaphana júiesin basqarady. Onyń basshylyǵymen uiym Aqmola oblysynda birneshe ret úzdik boldy. Adal eńbegi úshin kóptegen Qurmet gramotalarymen, «Kitaphana isiniń úzdigi» jáne «Kitaphana isiniń ardageri» belgilerimen marapattalǵan. Uzaq jyldar boiy Qazaqstan halqy Assambleiasynyń Aqmola filialynyń múshesi bolyp keledi.
Dina Syrǵabaeva
«Qareket Jaqsylyq Jasa» qoǵamdyq qorynyń negizin qalaýshy jáne jetekshisi. Áleýmettik kásipkerlik salasynda 20 jyldyq jumys tájiribesi bar. Qyzmet etken jyldary taýarlar men qyzmetter óndirisin, sondai-aq ótkizý naryǵyn jolǵa qoidy. Pandemiia kezinde Qor qurǵan arnaiy top 3000 qolǵap taratty. Dina Syrǵabaeva men onyń seriktesteri elimizdiń ár óńirinen 1 000-nan astam muqtaj áieldi jumyspen qamtamasyz etti. Sonymen qatar, olar «Tigin jáne aspazdyq sheberlik» onlain-mektebin uiymdastyrdy. Synypta oqýshylar jartylai fabrikattar daiyndaýdy, kiim men toqyma tigýdi úirendi.
Buǵan deiin «Qazaqstannyń 100 jańa esimi» jobasynyń 4-inshi kezeńine ótinim qabyldaý bastalǵanyn jazǵan bolatynbyz.
Ótinimder 2021 jyldyń 22 aqpanynan 15 naýryzyna deiin 100janaesim.ruh.kz saitynda qabyldanady.
