Foto: Májilistiń baspasóz qyzmetinen
Búgin Májilistiń ekinshi sessiiasyndaǵy sońǵy jalpy otyrys ótti, -dep habarlaidy "Ult Aqparat".
Osy sessiiada 39 jalpy otyrys ótip, 302 másele qaraldy. Májilis 100 zań qabyldady, sonyń ishinde ár úshinshi zańǵa depýtattar bastamashylyq etken eken.
"Búgin biz Májilistiń ekinshi sessiiadaǵy jumysyn aiaqtaǵaly otyrmyz. Jalpy parlamenttik sessiia jumysyn juma kúni Parlament Palatalarynyń birlesken otyrysynda qorytyndylaimyz", -dedi Májilis spikeri Erlan Qoshanov.
Erlan Qoshanov óz sózinde qandai zań jobalaryn qabyldanǵandaryn aityp ótti.
"Olardyń ishinde – sot júiesi týraly konstitýtsiialyq zań, adam saýdasyna qarsy is-qimyl týraly, mass-media týraly zańdar bar. Sondai-aq, qoǵamdy uzaq ýaqyt boiy alańdatyp kelgen ótkir máseleler – halyqtyń shamadan tys kredit alýy, áielder men balalar qaýipsizdigi, sondai-aq lýdomaniia máseleleri zańnamalyq turǵydan retteldi. Asa mańyzdy zańdar ishinen «Ulttyq qor – balalarǵa» jáne jer qoinaýyn paidalaný máseleleri týraly zańdardy atap aitqym keledi. Bul zańdar – áleýmettik ádilettilik qaǵidattary is júzine asyp jatqanynyń aishyqty aiǵaǵy", -dedi spiker.
Ondaǵan jyldar boiy sheshilmei kelgen shahterlerdiń, kenshilerdiń, metallýrgterdiń zeinetke shyǵý jasyn tómendetý máselesi bolǵanyn aitqan Májilis spikeri "Ziiandy eńbek jaǵdailarynda jumys isteitin adamdardy áleýmettik turǵydan qorǵaý týraly" zań qabyldap, sol arqyly 400 myńnan astam óndiris eńbekkerleriniń talap-tilegi oryndalǵanyn jetkizdi.
Buǵan qosa, el Prezidentiniń jańa ekonomikalyq saiasatyn iske asyrý úshin memlekettik satypalym, biznes júrgizý, jylý energetikasy, jer qoinaýyn paidalaný týraly zańdar qabyldandy.
"Depýtattar Memleket basshysynyń úshinshi Ulttyq quryltaida aitylǵan zańnamalyq bastamalaryn da iske asyrdy. Atap aitqanda, veip taratýǵa qarsy, biregei tarihi obektilerdi qorǵaýǵa arnalǵan zańnamalyq sharalar qabyldandy. Vandalizm úshin jaýapkershilik kúsheitildi", -deidi E. Qoshanov.
Májilismender memlekettik organdardyń laýazymdy adamdary atyna 527 depýtattyq saýal joldaǵan eken.
Halyqpen kezdesýlerde aitylǵan máseleler men problemalardy sheshý jaiynda Májilis Úkimettiń jaýabyn sessiia barysynda eki ret tyńdaǵan. Alaida áli de sheshilmegen máseleler kóp ekenin Erlan Qoshanov aityp ótti.
"Shaǵyn mektepter, úsh aýysymdy jáne avariialyq kúidegi mektepter problemasyn sheshý qajet.Densaýlyq saqtaý salasyn qarjylandyrý tetikteri jete pysyqtalmaǵan. Jylý elektr ortalyqtaryna qatysty sheshilmegen máseleler bar. Óńirlerde olardyń 80 paiyzǵa jýyǵy tozǵan. Sýmen jabdyqtaý máselesinde de jaǵdai osyndai. Aýyl sharýashylyǵy qajettilikteri úshin sýmen jabdyqtaý jáne azamattardy taza aýyz sýmen qamtamasyz etý jaiy asa máz emes. Únemi kóterilip júrgen, úlken problemanyń taǵy biri – joldardyń ahýalyna qatysty. Jalpy, bul aitylǵan problemalar biyl ǵana paida bolyp otyrǵan joq. Olardy sheshý úshin júieli, turaqty sharalar qabyldaý qajet", -deidi ol.
