Úkimet otyrysynan keiin QR Ulttyq ekonomika ministri Timýr Súleimenov Qyrǵyzstan bas tartqan 100 mln dollar kólemindegi tehnikalyq kómek jónindegi kelisimsharttyń kúshin joiý ońai sharýa emes ekenin aitty, dep habarlaidy Baq.kz tilshisi.
Súleimenov otyrystan shyǵa salysymen jýrnalister odan Qyrǵyzstanǵa berilmei qalǵan 100 mln dollar qandai maqsatqa jumsalatynyn surady. Ministr aldymen qos el arasynda jasalǵan kelisimsharttyń kúshin joiý qajettigin alǵa tartty.
«Qazaqstan Qyrǵyzstanǵa beretin 100 mln dollar kólemindegi kómek týraly kelisim sharttyń kúshin joiý qajet. Bul - ońai protsedýra emes. Biz aradaǵy kelisim shartty ratifikatsiiadan ótkizdik qoi. Ol qujat Qazaqstan parlamentinde qaralǵan. Endi qujattyń kúshin joiý úshin bizge ishki protsedýralardy júrgizý qajet. Osy protsedýralar aiaqtalǵannan keiin sheshim qabyldanady. Alaida bul másele kelesi jyldyń aqpan aiynda naqtylanady», - dep túsindirdi Timýr Súleimenov.
Aita keteiik, Qazaqstan Qyrǵyzstanǵa Eýraziialyq ekonomikalyq odaq talaptaryna sai kelýi úshin 100 mln dollar kóleminde tehnikalyq kómek kórsetpek bolǵan edi. Alaida qyrǵyz tarapy bul kómekten bas tartty.
