10 jylda qosymsha 50 mln gektar jaiylymdyq jer ainalymǵa tartylady. Bul jaiynda senatorlardyń depýtattyq saýalyna QR Premer-Ministri Asqar Maminiń jaýabynda aitylǵan, dep habarlaidy "Ult aqparat".
«Aýyldyq eldi mekender turǵyndarynyń mal basy úshin jaiylymdyq jerlerdiń tapshylyǵy problemasy bar. Eldi mekenderdiń jaiylym alqaptarynyń alańy bar bolǵany 20,9 mln gektardy quraidy. Halyqtyń qolda bar aýyl sharýashylyq janýarlary úshin 50 mln gektardan astam jaiylym qajet. Tapshylyq - 30 mln gektardan astam. Bul rette, aýyl sharýashylyǵy taýar óndirýshilerinde (ShQ, FSh, JShS, AQ jáne t.b) 73,4 mln gektar jaiylymdyq jerler bekitilgenin atap ótý kerek. Onyń ishinde 40 mln gektardan astam jaiylym jerler paidalanylmai jatyr», -dedi Úkimet basshysy.
Asqar Maminniń atap ótýinshe, osy problemany sheshý úshin jáne jaiylymdyq jerlerdi utymdy paidalaný boiynsha Qazaqstan Respýblikasynyń Úkimeti tarapynan birqatar sharalar qabyldanýda. 2019 jylǵy qazanda «Jaiylymdar týraly» 2017 jylǵy 20 aqpandaǵy QR Zańyn iske asyrý maqsatynda QR Aýyl sharýashylyǵy ministrliginiń qyzmetkerleri Májilis depýtattarymen birlesip, aýyldyq okrýgter men eldi mekender bólinisinde jaiylymdardy basqarý jáne olardy paidalaný jónindegi jospardyń pilottyq jobasyn ázirledi. Ol uiymdasqan sharýashylyqtar paidalanbaityn jaiylymdardy aýyldyq eldi mekender turǵyndarynyń mal basyn jaiý úshin 2 jyl boiy paidalanýǵa múmkindik beredi. Jospar jobasy barlyq oblys ákimdikterine úlgi retinde joldandy. Sonymen qatar, 2020 jylǵy 29 sáýirdegi № 145 QR AShM-nyń buiryǵymen «Janýarlardy jaiý tártibi men uiymdastyrylýyn retteitin aýyl sharýashylyǵy janýarlaryn jaiýdyń» úlgilik qaǵidalary bekitildi. Zańnyń 15-babyna sáikes, aýyldyq eldi mekender aýmaǵynyń sheginde ornalasqan jaiylymdarda tek analyq mal basy ǵana jaiylady. Qalǵan mal basy shalǵaidaǵy jaiylymdarǵa jiberiledi. Bul shara eldi mekender shegindegi jaiylymdardy jeńildetýge jáne paidalanylmaityn shalǵaidaǵy jaiylymdardy tiimdi paidalanýǵa múmkindik beredi.
«Ókinishke orai, aýyl halqy eldi mekenderden 30-40 jáne odan da kóp shaqyrym qashyqtyqta ornalasqan shalǵaidaǵy jaiylymdardy paidalanǵysy kelmeidi. Óitkeni janýarlardy kún saiyn tańerteń jaiýǵa, al keshke úige ákelý qajet dep sanaidy. Maldy jaiýdyń shalǵaidaǵy júiesi jaiylymdyq alqaptardy barlyq jaiylymdyq maýsymda paidalanýǵa múmkindik beredi. Iaǵni janýarlar kóktemnen kúzge deiin, qoraǵa kelgenge deiin táýlik boiy jaiylymdarda bolady. Budan basqa, halyqqa tiesili mal basyn qamtamasyz etý maqsatynda QR Prezidentiniń 2019 jylǵy 17 qyrkúiektegi tapsyrmasynyń hattamasyna sáikes 10 jyl ishinde qosymsha 50 mln gektar jaiylymdyq jer ainalymǵa tartylatyn bolady», - dedi Premer-Ministr.
