QR Ishki ister ministriniń birinshi orynbasary Marat Qojaev sheteldikterge Jeke sáikestendirý nómerin (JSN-IIN) berý men azamattyq berýdiń ara-jigin túsindirdi, dep habarlaidy QazAqparat.
«Ótken aptanyń málimetteri boiynsha, 10 myńǵa jýyq adam Jeke sáikestendirý nómerin aldy. Reseidegi kóptegen qarjy institýttarynyń protsedýralyq jumysyna sanktsiialar kedergi keltirdi, sondyqtan olar bizge júginedi. JSN alǵandardyń bizdiń elimizge kelýi de mindetti emes. Olar bizdiń bank kartochkalarymyzdy ǵana paidalana alady», - dedi Marat Qojaev Májilistiń jalpy otyrysynda tilshilerge bergen suhbatynda.
Onyń aitýynsha Qazaqstandyq jeke sáikestendirý nómerin kez kelgen shet eldiń azamaty ala alady.
«Ol kásipkerlik qyzmetti, qarjylyq operatsiia protsesterin jáne basqa da máselelerdi júrgizý úshin kerek. JSN – jai ǵana qural, ol azamattyqty nemese elde turýǵa yqtiiarhatty bildirmeidi», - dedi Qojaev.
Aita keteiik, jyl basynan beri Qazaqstanǵa Reseiden 130 myńǵa jýyq adam keldi, onyń 120 myńy keri oralǵan. Al Ýkrainanyń 3481 azamaty elde júr.
Qazirgi statistikaǵa súiensek, 170 Resei azamaty, 7 Ýkraina azamaty Qazaqstan azamattyǵyn alýǵa ótinish bildirgen.
