Normaǵa sáikes, ár synypta 25 balaǵa deiin bolýy kerek. Bul týraly Bilim jáne ǵylym ministrligi uiymdastyrǵan onlain brifingide aityldy, dep habarlaidy QazAqparat.
«Egov.kz portaly arqyly balany bir mektepten basqa mektepke aýystyrýǵa bolady. Bilim jáne ǵylym ministrliginiń quramynda 20 myń mekeme bar. Bul uiymnyń bárin aqparattandyrý qiyn, sol sebepti bizge basqa aqparattyq júieler kómektesedi. Biz olarmen birigip jumys isteimiz. Ár óńirde ártúrli aqparattyq júie tur jáne bul qalypty jaǵdai», - dedi Bilim berýdi tsifrlyq transformatsiialaý departamentiniń direktory Qanat Kenbai.
Sondai-aq, QR BǴM Mektepke deiingi jáne orta bilim komitetiniń tóraiymy Maira Meldebekova 1-synypqa baratyn balanyń turǵylyqty mekenjaiy basqa qalada bolsa ne isteý kerektigin aitty.
«Mundai jaǵdaida oqýshynyń turǵylyqty mekenjaiy talap etilmeidi. Biraq mektepke habarlasyp, mán-jaidy túsindirip, máseleni sheshýge bolady. Birinshi synypqa qabyldaý týraly ótinishti mektep direktorynyń atyna jazady, al mamandandyrylǵan oblystyq mektep bolsa – ótinishti oblystyq nemese qalalyq bilim basqarmasyna jazady. Mektep aldymen óziniń mikroýchastogyndegi oqýshylardy qabyldaýy kerek. Biylǵy talap boiynsha ár úsh bala sol mektep mańyndaǵy úilerden alynsa, tórtinshi bala basqa territoriiadan kele alady. Normaǵa sáikes, ár synypta 25 balaǵa deiin bolýy kerek, biraq bala sany kóp bolǵan soń bul talaptar saqtala bermeidi. Bul máseleni jergilikti organdar kezeń-kezeńimen sheshýi tiis», - deidi ol.
