1 shildeden bastap kúshine enetin jańa Ákimshilik rásimdik-protsestik kodekstiń basty normalary jaiynda Shymkent qalasyna saparmen kelgen Memleket basshysynyń kómekshisi – QR Prezidenti Ákimshiligi ótinishterdi qaraýdy baqylaý bóliminiń meńgerýshisi Tamara Dúisenova qala aktivimen bolǵan kezdesýde aitty. Bul týraly shahar ákimdiginiń baspasóz qyzmeti habarlady.
«1 shildeden bastap birinshiden, «e-Ótinish» aqparattyq júiesi arqyly ótinishter qabyldaityn biryńǵai arna iske qosylady. Tipti, «Qazposhtamen» qaǵaz júzinde joldanǵan ótinishterdiń ózi tsifrlyq formatqa aýystyrylyp, elektrondy túrde tirkeledi. Osylaisha, «e-Ótinish» júiesi ótinishterdi qaraýdyń búkil tarihy saqtalatyn birtutas bazaǵa ainalady. Bul barlyq memlekettik jáne sot organdaryna, sonymen qatar ótinish berýshilerge qoljetimdi júie bolady», - deidi T.Dúisenova.
Ekinshiden, memlekettik organdar ótinishterdi burynǵy qabyldanǵan sheshimder men berilgen jaýaptardy eskere otyryp qaraidy.
Úshinshiden, árbir qaralǵan aryz-ótinishke memlekettik organda ákimshilik is ashylady. Onyń talaptary men sharttary Kodekste naqty kórsetilgen. Eger aryz iesiniń talaby qanaǵattandyrylmaityn bolsa, onda memlekettik organ mindetti túrde aryz iesin qabyldap, oǵan túsinikteme beredi nemese zańdarda kórsetilgen sheshý joldaryn túsindiredi.
Aryz iesi ol jaýapqa da qanaǵattanbasa, memlekettik organnyń nemese memlekettik qyzmetkerdiń ústinen sotqa shaǵymdanýǵa quqyly.
Tórtinshiden, jańa tásildiń qazirgi júieden ereksheligi – endi memlekettik organnyń jaýabyna shaǵymdaný jańa tásilmen júredi, berilgen jaýaptyń nemese sheshimniń durystyǵyn jaýapty memlekettik organ dáleldeitin bolady. Iaǵni aryz iesi tek talap-aryzyn ǵana sotqa jetkizedi.
Jańa Kodekste memlekettik organnyń azamattar aldyndaǵy jaýapkershiligi kúsheitilip otyr.
