2018 jyldyń 1 shildesinen bastap Qazaqstandaǵy meditsinalyq uiymdar naýqastardy qaǵazsyz qabyldaýǵa kóshedi, dep habarlaidy QazAqparat tilshisi.
Sáikesinshe, naýqastarǵa ambýlatoriialyq kartalar men fliýrografiialyq jazbalardy alyp júrýdiń qajeti bolmaidy. Meditsinalyq qyzmet alý úshin olarǵa jeke kýálikti kórsetý jetkilikti.
«Biyl 1 qańtardan bastap, 4 oblys (Qaraǵandy, Qostanai, BQO) qaǵazsyz aýrýhanalar pilottyq jobasyna endi. 1 sáýirden bastap, bul pilottyq jobaǵa taǵy 4 aimaq (OQO, Mańǵystaý, Pavlodar, SQO) qosyldy. 1 shildeden bastap - qalǵan óńirlerdiń barlyǵy jáne Astana men Almaty qalalary naýqastardy qaǵasyz qabyldaýǵa kóshedi. Iaǵni, pilottyq joba aiasynda ambýlatoriialyq kartalar joiylady. 2019 jyldyń 1 qańtarynan bastap, tegin meditsinalyq kómektiń kepildendirilgen kólemin kórsetetin barlyq meditsinalyq uiymdar 100% tek qana aqparattyq júielerde jazba júrgizedi jáne aqparattar qaǵazǵa kóshirilmeidi», - dedi QR Densaýlyq saqtaý vitse-ministri Oljas Ábishev Úkimette ótken baspasóz máslihatynda.
Vitse-ministrdiń aitýynsha, qazirdiń ózinde elektrondy úkimet pen meditsinalyq aqparattyq júieler kómegimen dárigerge onlain-portaldar arqyly jazylý, dárigerdi úige shaqyrý qyzmetterin paidalanýǵa bolady.
