2021 jyly BJZQ-dan ai saiynǵy zeinetaqy tólemi eń tómengi kúnkóris deńgeiiniń 70% kem emes mólsherde júzege asyrylady. Buryn BJZQ-dan ai saiynǵy zeinetaqy tólemi eń tómengi kúnkóris deńgeiiniń 54% kem emes mólsherde júzege asyrylǵan bolatyn. Osylaisha alýshylardyń kópshiliginde BJZQ-dan alatyn tólemderdiń mólsheri ulǵaidy. Bul týraly BJZQ-nyń baspasóz qyzmeti habarlady.
Eskerte ketsek, 2021 jyldyń 1 sáýirinen bastap BJZQ-dan tólenetin ai saiynǵy zeinetaqy tóleminiń mólsheri Qazaqstan Respýblikasy Úkimetiniń 2013 jylǵy 2 qazandaǵy № 1042 qaýlysynyń erejelerine sáikes jańa Ádisteme boiynsha esepteledi.
Osy Ádistemege sáikes zeinetaqy tólemderin júzege asyrýdyń birinshi jylyndaǵy zeinetaqy tólemderiniń jyldyq somasy zeinetaqy jinaqtary somasynyń zeinetaqy jinaqtary tólemderiniń mólsherlemesine kóbeitindisi retinde esepteletin bolady – 6,5 %. Odan keiingi jyldary ai saiynǵy zeinetaqy tóleminiń mólsheri ótken jylǵy ai saiynǵy zeinetaqy tóleminiń mólsherin zeinetaqy tólemderin indeksteý mólsherlemesine jyl saiyn arttyrý jolymen qaita esepteletin bolady – 5%.
Eger zeinetaqy jinaqtarynyń somasy ótinish bergen kúnge eń tómengi zeinetaqynyń on eki eselengen mólsherinen aspaityn bolsa tiisti qarjy jylyna belgilengen respýblikalyq biýdjet týraly zańǵa sáikes atalǵan soma alýshyǵa BJZQ-dan bir-aq ret tólenedi ( 2021 jyly – 519 264 teńge = 12 * 43 272).
BJZQ-dan zeinetaqy tólemderin alý quqyǵyn 2018 jylǵy 1 qańtarǵa deiin iske asyrǵan adamdarǵa zeinetaqy tóleminiń jyl saiynǵy mólsheri eń tómengi zeinetaqynyń otyz eselengen mólsherinen kem bolmaidy (2021 jyly 30 h 43 272= 1 298 160 teńge). Tólemder buryn tańdalǵan keste boiynsha júzege asyrylady.
2018 jylǵy 1 qańtardan bastap 2021 jyldyń 1 sáýirine deiin zeinetaqy tólemderin ala bastaǵan zeinettegi adamdarǵa tólemderdi esepteýdiń jańa Ádistemesindegi ózgeristerdiń qatysy bolmaidy. 2021 jyly olar BJZQ-dan eski ádisteme boiynsha (jinaqtar somasy aǵymdaǵy qun koeffitsientine kóbeitilip, 12 aiǵa bólingen kezde) eseptelgen tólemderdi alýdy jalǵastyra beredi. Biraq 2022 jyldan bastap olardyń qazirgi alyp júrgen tólemderiniń somasy 5%-ǵa ulǵaitylatyn bolady.
Budan basqa, zeinetaqy tólemderiniń mólsherin esepteýdi júzege asyrý Ádistemesinde belgili bir sanattarǵa jatatyn, iaǵni merzimsiz ýaqytqa belgilengen 1 nemese 2-toptaǵy múgedektigi bar, sondai-aq, jinaqtary mindetti kásiptik zeinetaqy jarnalary esebinen keminde alpys ai jinaqtalatyn ziiandy jáne qaýipti óndiristerde jumys istegen alýshylar úshin túzetýlerdi arttyrý koeffitsientteri kózdelgen. Bul rette, eger adamnyń birneshe sanattarǵa qatysy bolsa onda eń úlken mánge ie túzetý koeffitsienti qoldanylady.
Esterińizge sala keteiik, BJZQ-dan zeinetaqy tólemderi jeke zeinetaqy shotyndaǵy zeinetaqy jinaqtary taýsylǵanǵa deiin júzege asyrylady.
