1 sáýirde Otbasy bankke aýdarylǵan birjolǵy zeinetaqy tólemderi Biryńǵai jinaqtaýshy zeinetaqy qoryna qaitaryla ma? Bul týraly banktiń baspasóz qyzmetinen málim etti, dep habarlaidy QazAqparat.
«2022 jylǵy 1 sáýirde qazaqstandyqtardyń Otbasy banktegi arnaiy shottaryndaǵy birjolǵy zeinetaqy tólemi BJZQ-ǵa qaitarylady degen qaýeset tarady. Osyǵan bailanysty, Otbasy banktegi azamattardyń arnaiy shottaryndaǵy qarajat olardyń menshigi ekenin túsindiremiz. Arnaiy shotqa aqsha túsken sátten bastap qazaqstandyqtardyń turǵyn úi jaǵdailaryn jaqsartý maqsatynda olardy paidalaný boiynsha rastaityn qujattardy usyný úshin 20 jumys kúni bar. Osylaisha, naýryzdyń aiaǵynda arnaiy shotqa túsken aqshany 2022 jyldyń 30 sáýirine deiin qoldanýǵa bolady. Eger qarajat emdelý maqsatynda suralyp, arnaiy shotqa túsken bolsa, onda azamattardyń olardy paidalaný maqsatyn rastaý úshin 45 jumys kúni bar», - delingen atalǵan bank habarlamasynda.
Qarjy institýtynyń atap ótýinshe, arnaiy shotqa óz qarajatyn túsirip qoiǵan ótinish berýshiler banktiń aimaqtyq filialdaryna barmai-aq qujattardy asyqpai jinaýy kerek. Óitkeni barlyq rásimder onlain rejiminde ótedi.
Sondai-aq áleýmettik jelilerde sońǵy úsh kúnde zeinetaqy jinaqtarynyń artylǵan somasy joǵalyp ketti degen qate málimdemeler taralyp jatyr. Mysaly, 2022 jylǵy 25-28 naýryz aralyǵynda berilgen 53 649 ótinimdi, suralǵan qarajattyń jetkiliksizdigine bailanysty, BJZQ keri qaitardy. Buǵan valiýta baǵamynyń ózgerýi jáne osyǵan bailanysty zeinetaqy jinaqtaryn qaita baǵalaý áser etti. 2022 jylǵy 25 naýryzda zeinetaqy aktivterin qaita baǵalaýǵa yqpal etken dollardyń baǵamy 494,16 teńgeni, al 2022 jylǵy 28 naýryzda 484,49 teńgeni qurady.
Óziniń birjolǵy zeinetaqy tólemin burynǵy shekti kórsetkish boiynsha paidalaný úshin Otbasy bank enpf-otbasy.kz portalynda ótinim berýdi 2022 jyldyń 29 naýryzyna deiin úlgerýdi usyndy. Sebebi, turǵyn úi jaǵdailaryn jaqsartýǵa jáne otbasyn emdeýge arnalǵan BZT-in paidalaný qaǵidalaryna sáikes bank 2 jumys kúni ishinde ótinimdi óńdep, BJZQ-ǵa jiberedi. BJZQ qoldanystaǵy shekti kórsetkish boiynsha ótinimderdi 2022 jyldyń 31 naýryzyn qosa alǵanda saǵat 23:59-ǵa deiin qabyldaidy jáne qarastyrady.
Búgin BJZQ-ǵa joldanatyn ótinimdi tolyq jasap aiaqtamaǵan 35 myń ótinish berýshige SMS habarlama jiberiledi. Olardy portalǵa kirip, ETsQ kómegimen eki ótinishke qol qoiýdy suraimyz: jeke tabys salyǵyn ustap qalý týraly jáne birjolǵy zeinetaqy tólemine arnalǵan ótinish.
«Ótinimderdiń kópshiligi qaitalanady. Birneshe ret ótinish bergen rekordsmender bar. Biraq dál osy naýryz aiynda biz qalypty jaǵdaiǵa jatpaityn protsesterdi baiqadyq: mysaly, 5 teńge alýǵa ótinim boldy, 40 teńgeden 2000 teńgege deiingi somaǵa 161 ótinim joldandy. Adamnyń kompiýterlik saýattylyǵynyń ortasha deńgeiinde portalda bolý ýaqyty 15-20 minýtty alatynyn eskersek, mundai operatsiialardyń qarjylyq máni túsiniksiz.
Sondai-aq aqylǵa qonymsyz suranystary bar ótinimder túse bastady. Mysaly, portalda 200 mln teńgeden 6 mlrd teńgege deiin 627 ótinim kelip tústi. Birjolǵy zeinetaqy tólemderiniń mundai somasy buryn-sońdy bolmaǵany túsinikti. Mamyr aiynyń basynda zeinetaqy jinaqtaryn paidalaný jáne osy biregei jobanyń erekshelikteri týraly halyqqa tolyq esep jariialaýdy josparlap otyrmyz», - dep atap ótti «Otbasy bank» AQ Basqarma tóraǵasy Lázzat Ibragimova.
