Búgin QR Parlamenti Senatynyń jalpy otyrysynda «Qazaqstan Respýblikasynyń keibir zańnamalyq aktilerine jer qatynastaryn retteý máseleleri boiynsha ózgerister men tolyqtyrýlar engizý týraly» QR zańy qabyldandy, dep habarlaidy QazAqparat.
Zań jobasy boiynsha negizgi baiandama jasaǵan QR Premer-Ministriniń orynbasary - Aýyl sharýashylyǵy ministri Ómirzaq Shókeevtiń aitýynsha, qujatta aýyl sharýashylyǵy jerlerin qazaqstandyqtarǵa jalǵa berý normasyn saqtaý jáne jetildirý maqsatynda jalǵa berýdiń jańa ári arnaiy tártibi qarastyrylǵan. Jer berý tártibiniń ashyqtyǵy men aiqyndyǵyn qamtamasyz etý úshin konkýrsqa qoiylatyn jerler tizbesin bekitý, ony mindetti túrde qoǵamdyq keńestermen jáne úkimettik emes uiymdarmen kelisý, jer komissiiasynyń quramyna 50 paiyzdan kem emes qoǵamdyq keńester men uiymdardyń ókilderin engizý kózdelgen.
Sonymen birge konkýrstyń jariialylyǵy men oǵan barlyq qatysýshylardyń teń qoljetimdiligin qamtamasyz etý maqsatynda jańa tártip boiynsha konkýrs ókiziletindigi týraly habarlandyrý tek qana aýdandyq qana emes basqa da BAQ-ta, Aýyl sharýashylyǵy ministrligi men ákimdikterdiń internet resýrstarynda ornalastyrylady.
Aýyl sharýashylyǵy jerlerin tiimdi paidalaný jáne jalǵa alýshylardyń jer paidalaný jónindegi qabyldaǵan mindettemelerin qadaǵalaý maqsatynda jalǵa alýdyń alǵashqy 5 jylynda ár jyl saiyn, kelesi kezeńde sýarmaly jerlerdi ár 3 jyl saiyn, al sýarylmaityn jerlerdi ár 5 jyl saiyn monitoring júrgizý belgilenedi.
«Aýyl sharýashylyǵy jerlerin úlken kólemde bir qolǵa berilýin boldyrmaý maqsatynda zań jobasynda ár oblystyq ákimshilik aýdandarynda aýyl sharýashylyǵy jerleriniń shektik mólsherin belgileý kózdelgen. Bir qolǵa beriletin jerlerdiń mólsherin málsihattar men ákimdikterdiń birlesken usynysymen Úkimet bekitedi. Bul shekti mólsherdi aiqyndaý úshin tiisti esepteý ádistemesi ázirlendi», - dedi ol.
Ministrdiń aitynsha, memlekettiń shekaranyń shekaralyq beldeýinde ornalasqan aýyl sharýashylyǵy alqaptary eshkimge berilmeidi. Tek jergilikti halyqqa jaiylym, shabyndyq retinde ǵana paidalanýǵa ruqsat etiledi. Shekaralyq aýmaqta ornalasqan jer ýchaskelerin sheteldikterge nemese QR-nyń sheteldiktermen nekege turǵan azamattaryna nemese quramynda sheteldikter bar QR zańdy tulǵalaryna berýge tyiym salynady. Bul aýmaqta ornalasqan aýyl sharýashylyǵy jerleri tek qazaqstandyqtarǵa ǵana jalǵa beriletin bolady.
«Aýyldyq jerlerde jergilikti turǵyndardyń jeke aýla malyna jaiylym jetispeýshiligin sheshý maqsatynda zań jobasynda jergilikti halyqqa mal ustaý úshin jaiylym alqaptaryn anyqtaý týraly norma kózdelýde. Osy maqsatta aiqyndalǵan jaiylymdardy jalǵa berýge tyiym salynatyn bolady», - dedi Ómirzaq Shókeev.
Sonymen qatar onyń aitýynsha, búgingi kúni eldi mekenderdiń mańyndaǵy jaiylymdardyń kóbi jeke jáne zańdy tulǵalarǵa berilip ketkendigin eskerip, ol jerlerdi qaitarý úshin memlekettik muqtajǵa jatqyzý zań jobasymen belgilengen.
«Osy zań jobasynda aýyl sharýashylyǵy maqsatyndaǵy jerlerdi jekemenshikke satý jáne sheteldikterge jalǵa berý týraly moratoriidiń sheńberin keńeitý qarastyryp otyr. Onda 1 paiyz bolsa da sheteldik úlesi bar qazaqstandyq zańdy tulǵalarǵa jer berilmeitin bolady. Bul rette zań jobasy normalarynyń barlyǵy jer komissiiasy jumysynyń qorytyndysy negizinde ázirlengen jáne aýyl sharýashylyǵy jerlerin tek qana qazaqstandyqtarǵa jalǵa berý institýtyn jetildirýdi kózdeidi», - dedi ministr.
