Sheteldegi 1 millionǵa jýyq qandas Qazaqstanǵa kóship kelýge nietti. Bul týraly «Otandastar qory» KEAQ vitse-prezidenti Maǵaýiia Sarbasov málim etti, dep habarlaidy QazAqparat.
«QR Aqparat jáne qoǵamdyq damý ministrliginiń tapsyrmasyna sáikes biz qandastarǵa arnalǵan «Erýlik» atty jańa sait ashtyq. Sait qazaq jáne orys tilderinde, latyn jáne tóte jazý nusqalarynda aqparat taratyp jatyr. Mundaǵy maqsat – otanǵa kóship kelýge nietti qandastardy aqparatpen qamtý. Osy oraida, elimizde syrttan kelgen qandastar jii ornalasatyn Aqmola, Qostanai, Pavlodar, Soltústik Qazaqstan jáne Shyǵys Qazaqstan oblystarynyń áleýmettik-ekonomikalyq damý kórsetkishi kóship kelýdi josparlaǵan qandastarǵa aqparat túrinde usynylyp otyr. Iaǵni qandastar aldyn ala qaida keletinin, ol jerdegi jol qandai, mektep bar ma jáne taǵy basqa mańyzdy jaittarmen aldyn ala tanysa alady», - dedi M. Sarbasov.
Sondai-aq qordyń vitse-prezidenti qazirgi tańda 1 mln-ǵa jýyq qandas elge kóship kelýge nietti ekenin aitty.
«Búginde qandastarymyzdyń atalǵan saitqa kirý, oqý dinamakasy artyp keledi. Ásirese Qytai, Resei, Iran, Mońǵoliia, Ózbekstan, Ulybritaniia men Germaniiadaǵy qandastarymyzdyń erýlik saityna jii kiretini baiqalyp otyr. Demek atalǵan elderdegi qandastarymyz otanyna kelýgi qyzyǵýshylyq tanytady degen sóz. Bizdegi saraptamalyq taldaýǵa súiensek, búginde 1 millionǵa jýyq qandasymyz elge kóship kelýge nietti. Karatindik talaptar jeńildetilip, shekaralar ashylsa kósh ulǵaiady degen úmittemiz», - deidi ol.
