Qazaqstannyń Ulttyq banki jekelegen salalarda qolma-qol aqshasyz tólemderdi qabyldaý úshin bank komissiiasynyń tómendegeni týraly aitty, dep habarlaidy "Ult aqparat".
«QR Prezidenti Qasym – Jomart Toqaevtyń 2019 jylǵy 2 qyrkúiektegi «Syndarly qoǵamdyq dialog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda aitylǵan qolma-qol aqshasyz tólemderdi damytý jáne bankterdiń komissiialaryn tómendetý sharalaryn qabyldaý týraly tapsyrmany oryndaý sheńberinde Qazaqstan Ulttyq banki bankterdiń tólem kartochkalaryn paidalana otyryp, tólemderdi qabyldaý úshin alatyn komissiianyń tómendetilgeni týraly habarlaidy», – delingen Ulttyq bank tartqan habarlamada.
Ulttyq banktyń málimetinshe, ózgerister 2020 jyldyń 1 mamyrynan bastap kúshine enedi. Bul mańyzdy áleýmettik máni bar ekonomikanyń jekelegen salalaryna qatysty: bilim berý, meditsinalyq qyzmetter, dárihanalar, turaq oryndary, aqyly joldarǵa aqy tóleý, aýyl sharýashylyǵy qyzmetteri, jyljymaityn múlikpen jasalatyn mámileler.
Qazaqstannyń Ulttyq banki osy ózgeristerdi qabyldaý úshin halyqaralyq tólem júielerimen jáne ekinshi deńgeidegi banktermen qajetti jumys júrgizdi.
Birlesken jumystyń, taldaý men talqylaýlardyń nátijesi boiynsha jańa segmentter aiqyndaldy, 2020 jylǵy 1 mamyrdan bastap Visa jáne Mastercard halyqaralyq tólem júieleri bankaralyq komissiianyń mólsherlemesin qazaqstandyq bankter úshin 2 ese - 1%-ǵa deiin, farmatsevtika segmentinde – 1,3%-ǵa deiin tómendetedi
Saýda komissiiasyn tómendetý bastamasyn tólem kartochkalary naryǵynyń negizgi qatysýshylary qoldady. Olardyń qataryna «Qazaqstan Halyq Banki» AQ, «Kaspi Bank» AQ, «Forte Bank» AQ, «Sberbank» AQ EB, «ATFBank» AQ, «Bank TsentrKredit» AQ, «Jysan Bank» AQ, «Eýraziialyq bank» AQ kirdi. Atalǵan ekinshi deńgeidegi bankterge ekvairingtik qyzmet naryǵynda (tólem kartochkasyn paidalana otyryp, qolma-qol aqshasyz tólemderdi qabyldaýdy uiymdastyrý boiynsha qyzmet kórsetý) jiyntyǵynda 96% tiesili.
Joǵaryda atalǵan qarjy institýttary saýda (ekvairingtik) komissiiasyn ortasha alǵanda 35%-ǵa (2,3% aǵymdaǵy ortasha mánnen tranzaktsiia somasynyń 1,5%-y ortasha mánine deiin) tómendetedi. Saýda komissiiasyn tómendetý kásipkerler men azamattarǵa banktik komissiia boiynsha óz shyǵystaryn tómendetýge múmkindik beredi. Bankaralyq jáne saýda komissiiasyn tómendetý jónindegi birlesken sharalardyń nátijesi biznes sýbektileri shyǵystarynyń naqty únemdelýi retinde jylyna 2 mlrd teńge deńgeiinde boljanady.
Jalpy alǵanda, qabyldanǵan sharalar jeke qolma-qol aqshasyz esep airysýdy odan ári damytý úshin jaǵdailardy eleýli túrde jaqsartady jáne «kóleńkeli ekonomikanyń» kólemi qysqarýyna oń áser etedi.
