2021 jyldyń 1 mamyrynan balalar sport sektsiialaryn jan basyna qarjylandyrý engiziledi. Bul jaiynda Májilis depýtattarynyń saýalyna orai QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Sportpen ainalysý qoljetimdiligin qamtamasyz etý úshin osy jyldyń 1 mamyrynan balalar sport sektsiialaryn jan basyna qarjylandyrýdy kózdeitin memlekettik sporttyq tapsyrys engiziledi. Jańa ádis sport sektsiialary tapshylyǵy problemasyn sheshýge jáne jeke sektordy tartý esebinen kórsetiletin qyzmetter sapasyn arttyrýǵa múmkindik beredi. Memlekettik sporttyq tapsyrys 4 jastan bastap 17 jasqa deiingi barlyq balaǵa, onyń ishinde erekshe qajettiligi bar balalarǵa taralady», - dedi Úkimet basshysy.
Onyń atap ótýinshe, memleket sport sektsiialaryna barýmen bailanysty shyǵyndardyń basym bóligin óz moinyna alady. Al ata-analar qyzmet kórsetýshini tańdaý jáne onyń qyzmetine baǵa berý quqyǵyna ie bolady. Shyǵyndar balanyń turǵylyqty jerin, sport túrin, qyzmet kórsetý ádisin jáne ózge de birqatar faktordy esere otyryp bekitilgen tarifpen tólenedi.
«Memlekettik sport tapsyrysynyń operatory qyzmeti jergilikti atqarýshy organdarǵa júktelgen. Ákimdikter memlekettik sporttyq tapsyrys ornalastyryp, qyzmet kórsetýshini irikteý, kezek qalyptastyrý, qyzmetke tólem jasaý jáne qarajattyń maqsatty túrde jaratylýyna baqylaý jasaý jumystaryn úilestiredi. Jemqorlyq táýekelderdi tómendetý úshin memleket, qyzmet kórsetýshi jáne ata-ana arasyndaǵy ózara qarym-qatynas elektrondy formatta qalyptastyrylady», - dedi ol.
Premer-Ministrdiń aitýynsha, barlyq qyzmet kórsetýshiler biliktilik irikteýinen ótedi.
«Irikteýdiń basty kriteriileriniń biri - kásibi sporttyq nusqaýshynyń bolýy. Qarjylandyrý jergilikti biýdjetten júzege asyrylady. Biyl buqaralyq sportty, onyń ishinde balalar sektsiiasyn qoldaý úshin kásibi sport klýbtaryna arnalǵan shyǵystardy qysqartý nátijesinde únemdelgen 16 mlrd teńgeni qosymsha baǵyttaý josparlanǵan», - dedi Asqar Mamin.
