2020 jyldyń 1 qyrkúieginen Qazaqstanda jer qoinaýyn paidalaný quqyǵy elektrondy konkýrs arqyly beriledi. Bul týraly búgin Energetika ministrliginiń alqa otyrysynda vedomstvo basshysy Nurlan Noǵaev aitty, dep habarlaidy QazAqparat.
«2020 jyldyń 1 qyrkúieginen bastap jer qoinaýyn paidalaný quqyǵy elektrondy konkýrs arqyly beriledi. Tiisti zań jobasyn Parlament depýtattary qoldap, oǵan Memleket basshysy qol qoidy. Bul óz kezeginde jer qoinaýyn paidalanýshylardy tańdaýda, olardyń múmkinshiligin, áleýetin eskerýde ashyqtyqty qamtamasyz etetindigine senimiz mol», - dedi ol.
Ministr dereginshe, 2019 jyly 260 jer qoinaýyn paidalanýshy kompaniia geologiialyq barlaý jumystaryna 158 mlrd teńge jumsady.
«Aita keterligi, 260 kelisimsharttyń tek 167-inde ǵylymi-zertteý jáne tájiribelik-konstrýktorlyq jumystarǵa shyǵyndarynyń 1 paiyzyn jumsaý jóninde mindettemesi bar. Qazirgi tańda muny qalǵan mekemelerge de tapsyrý jóninde jumys júrgizilip jatyr. Bul bólingen qarajatty munai óndirý kezinde jańa tehnologiialardy, tehnikany paidalanýǵa jumsaý jónindegi Úkimet basshysynyń tapsyrmasy bar. Ony Aqparat, Tsifrlyq damý ministrlikterimen oryndap jatyrmyz», - dedi N.Noǵaev.
