1 qyrkúiekten bastap birneshe óńirde tutynýshylar úshin elektr qýatynyń tarifi qymbattaidy, dep habarlaidy QazAqparat.
«Jýyqta ǵana elektr qýatyn óndirýshi stansalar úshin tarif qymbattatylatyn bolatyn. Saldarynan elektr qýatynyń tarifi qymbattaýy múmkin be? Tutynshýylar úshin tarif qalai ózgerýi múmkin? Ortalyq kommýnikatsiialar qyzmetinde ótken brifingide Tabiǵi monopoliialardy retteý komiteti tóraǵasynyń mindetin atqarýshysy Ashat Japsarbaiǵa osyndai saýal qoiyldy.
«Shynymen de, Energetika ministrligi elektr qýatyn óndirýshi uiymdar úshin tarifti orta eseppen 15 paiyzǵa kótergen bolatyn. Qarapaiym elektr tutynýshylarǵa onyń áseri qandai bolatynyna kelsek, qazir bul másele pysyqtalyp jatyr. Orta eseppen tarif 7,2 paiyzǵa ósedi. Iaǵni óńirler arasynda aiyrmashylyq bolady. Bul tarifti kótergen kezde qarapaiym halyqqa áser etpeitindei etip ótkizýge tyrysamyz. Iaǵni saralanǵan tarif belgileimiz. Osynyń arqasynda qarapaiym halyqqa aýyr timeitindei tarif bekitiledi dep úmittenemiz», - dedi komitet basshysy.
Onyń aitýyna qaraǵanda, 1 qyrkúiekten bastap birneshe óńirde tarif jospar boiynsha kóterilmek.
«Tarif shamamen 1 qyrkúiekten bastap kóteriledi. Elektr óndirýshileri úshin tarif 1 sáýirden bastap kóterilgen bolatyn. 1 shildede tarifterdiń bir bóligin kóterdik. Baiandamada 7 paiyz dep aitqanym osy bolatyn. 1 qyrkúiekten bastap tarif kóterilip úlgermegen óńirlerde ózgeris bolady. Sonda respýblika boiynsha orta eseppen 3,5 paiyz bolýy kerek», - dedi Ashat Japsarbai.
